Hlasak thiam minthang George Micheal a thi tiah thawng an thanh suimilam zeimawzat a rauh ah Sony Music Twitter nih muidawh hlasak thiam Britney Spear zong a thi ve tiah thawngthanhnak a tuah. Britney fan pawl cu lungkuai in a chiah dih hna.
Sony Music nih a tweet ning ahcun 'Britney Spear cu accident in a thi. A rauh hlanah fiang deuh in kan vun thanh than lai' tiah a tial. Minute tlawmpal a rauh in a vun tial thanmi cu 'RIP Britney Spear,' #RIP Britney 1981-2016" a vun ti than.
Britney Spear a thihnak thawng an thanhnak hi Sony Music company website le station hna in an si. Media kip le Britney fan pawl cu an khuaruahhar tuk i a rannak in social media kip ah an vakvai hna; a hmaan taktak hnga maw tiah siaherh ngaiin news an rel cio hna.
Asinain Britney Spear website ah a thihnak kong zong an tial fawn lo; a donghnak bik i hlasak thiam website ah an tialmi cu December 23 ah a si i, hla thar aa chuahmi kong a si. Asinain caan a vun rauh deuh in Sony Music Company nih a hmaan lomi thawng an thanhmi zong an lak dih colh hna. Fianternak cu an tuah rih lo.
CNN nih cun 'Britney Spear a thi lo; a dam ko. Global Sony Music nih a thihnak kong an tialmi hi an palh caah a si. Sony Company leiin fianternak a um rih lo' tiah a tial ve. An zumhmi cu Sony Music Company twitter an hack hna caah a hmaan loin an tialpiakmi hna a si lai ti a si. Ref: The Sun.