Israel ralchanh in UN nih riantuan a timh than ahcun, a caan a tangmi chungah President Obama nih veto power zong a hman cang lai tiah National Security Advisor Ben Rohodes nih nithumni ah a chim. CNN nih 'Kerry nih a bia-am in a langhter i, Obama nih veto a herh ahcun a hman cang lai a timi hi a hmaan maw tiah a hal i, 'Yes' tiah a leh.
Israel thinphan ngai rihmi cu UN nih naite bantukin vote a thlak than lai i, US nih zeihmanh tuah loin a um than sual lai timi a phang cang. Asinain Rhodes nih a chimmi cu 'Israel ralchanh in UN nih riantuan a timh than ahcun US nih kan duh ti lai lo' a ti. 1967 i Six Day War hnuah Israel nih a rak lakmi ram pawl kha UN nih an cohlanpiak lo.
UN nih UN Resolution 2334 biachahnak an rak tuahmi cu 'Six Day War ah a rak lakmi ah inn sa hlah seh' ti a si. Asinain Israel nih an sak chih lengmang. UN nih a kong a ceih tikah US dai tein a umnak a si tiah a chimmi zong an um.
Asinain Obama le a cozah dai tein an um lawng si loin Israel ralchanh in UN vote thlaknak hi Obama le a cozah khuakhannak a si tiah biathli a chuak diam. Israel Prime Minister Netanyahu zong nih nithumni ah a chimmi cu UN khuakhannak hi US riantuannak a si tiah fiang ko in a chim. Eygpt media pakhat zong nih fiang tein a chim. Asinain lih in serchommi a si tiah Obama riantuantu upa pakhat nih cun a chim ve.
Republican upa lei hrimhrim in fak tuk in Obama le a cozah an soisel hna i an mawhchiat hna. Israel zong fak tuk in a thinhung i, Israel ralchanh in vote a thlami ram tiang in dantatnak a tuah dih hna. A hnu pi lawng ah Obama ai ah minung pakhat nih 'Israel ralchanh in riantuan an timh than ahcun veto power a hman cang lai' tiah Rhodes nih a chim. Ref: TOI.