UN nih Israel ralchanh in vote a thlakmi cu President thimmi Donald Trump nih 'Israel zeirel lo tuk in an tuahmi hna hi US nih kan zoh kho lo' tiah a ti i, Israel Prime Minister Netanyahu nih Trump cungah lunglawmhnak a chim.
Nithumni ah Trump nih Obama cozah a phomh than hna. 'Israel hi Washington nih zeirel lo le upat loin zoh lengmang hi a si kho lomi a si. Obama cozah tangah Israel hi US hawi a si ti lo tiah Obama cozah a phomh hna. 'January 20 a ra cuahmah cang. Lung thawng in um ko rih u tiah Israel cu Trump nih thazaang a pek hna.
Israel zeirel lo le upat loin an tuahto lengmangmi hna hi kan zoh sawhsawh awk a si ti lo. US an hawi tha tuk a si tawnmi kha a tu cu a si ti lo. Iran nuclear kongah hnatlaknak an tuah hnu cun US le Israel hawikawm sinak a dih cang. Atu ah UN ah a si than. Israel na lung thawng ko. January 20 a ra cuahmah cang. Dengmang te lawng a duh cang' tiah Trump nih a tweet.
Israel Prime Minsiter Netanyahu nih a vun leh colh ve. 'President thimmi Trump, Israel fiang ko in na dirkamhnak le nakan hawikawmhnak cungah kan i lawm tuk' tiah a tweet colh ve.
Tu zarh ah khan Trump nih UN zong fak ngaiin a soisel hna. Inn Raang ah ka luh cun UN pi zong hi a kong ka ruah cang lai a ti. UN hi a thawng tukmi a rak si nain atu cun hmun khat ratnak mipi club sawh bantuk a si cang. Ngaihchia a si tiah a tweet rih. Obama cozah zong fak tuk in a soisel rih hna. Ref: TOI.