Karla Jacinto hi atu cun kum 24 a si cang. Kum hleihnih a si in misual (minung fir hmang) nih a rak hlen i, Mexico khuapi pakhat ah a rak kal pi. Innkhaan pakhat ah umter i, thla thum hrawnghrang tiang cu thilthuam phunphun in a lem i, a caan ahcun zarh khat deng tiang a tlau tak.
Karla nih a chimmi cu 'a hnu ah cun hlawhhlaang zuartu a rak si ti ka theih. Duhsah tete in a riantuanmi kong le ka tuah dingmi kong a ka chimh chin lengmang. Zeizah dah tangka na hal hna lai, zeitin dah na umpiak hna lai, zei caan sau dah na tuah pi hna lai, zeitin dah bia na ruah hna lai, tbk a ka chimh dih' a ti.
A chim thanmi cu 'tangka tam deuh hmuh na duh ahcun na thiam deuh a hau a ti tiang in a ka chim. Zingka 10: 00 a.m. in kan riantuan kan thok i, zantim tiang a si. Khua khat hnu khua khat ah a kan thial lengmang. Lam kip ah an kan vahter. Voikhat cu kan mileng John timi pa nih duhnak in a ka hnamh i, ka boss a kan hmuh.
A thinhung tuk i cincik in a ka tuk, mei ah rawhmi thirfung in a ka durh, a ka chuih. Kan mileng he naa duh tiah sual a ka puh' a ti. A chim thanmi cu 'kum 15 ka si in ka boss pa fa ka ngei. Fanu te a si i, lunglawmh leh loin ka duhmi na tuah lo ahcun na fa hi ka thah lai tiah a ka hrocer' a ti.
A chim than rihmi cu 'ningcang loin a ka tuahtu hna ah hin police bawi pipi zong an i tel. Biaceihtu zong an i tel i, tlangbawi le pastor zong an i tel. Huat an tlai tuk ning hi chim awk an tha lo. Ka tah deuhdeuh ah hin an nihchuak i, an i nuam deuh chin lengmang' tiah Karla Jacinto nih a chim chih.
Kum li chung hlawhhlang rian a tuan hnuah kum 16 a si hnu, 2008 ah vanthat ah Mexico khua ah minung firmi khamhtu nih an rak khamh. Kum 24 ka si cang. Kum li chung ka tuarmi le ka tonmi hi fawi tein ka nunnak in a dam kho lo. Ka lungthin nih a tuar i, ka mitthlaam ah dong loin an lang than lengmang.
Keimah bantuk harnak tong hna bawmh awk ah rights activist pakhat ka si cang tiah a chim. Atu cun vawleicung ram kip ah kal i, biatak tein minung firnak le covo kong a au pi cang. Minung firnak kong le covo kong tbk ceih awk ah Pope Francis he zong in tonnak an ngei.
Congress zong ah biachimnak caan an rak pek. Mexico ah hin fak piin minung fir a tamnak kong le a that lonak kong a chim cuahmah lio a si. Kum khat ah minung 20,000 hrawng hi fir le leirawi an si. Ref: Seventeen.