United States nih Iran cungah dantatnak a khinhmi cu December 31 ah a thi cang ding a si. US Senate nih nilini ah Iran Sanction Act (Iran Dantatnak Phung) timi cu kum 10 in chap than hna ding tiah an vote cang.
President Obama nih veto nawlngeihnak in a khamh lo ahcun US nih Iran cungah dantatnak a khinhmi hi kum 10 cu a kal than rih ding a si. Cucaah Iran nih President Obama cu 'Congress nih kum 10 chung dantatnak chap than ding in phung an sermi na khamh/veto lo ahcun fak tuk in lehrulnak kan tuah ve lai tiah an vun thihpheih cang.
Iran President Hassan Rouhani nih zarhpini ah 'President Obama nih min a thutpiak hna ahcun nuclear hnatlaknak kan tuahmi a buar lai' tiah a chim. A chim thanmi cu 'US nih dantatnak a kan khinhmi hi a kum a dihter ding hrimhrim a si cang' tiah a chim chih.
Iran nuclear sernak nih vawleicung ram fak piin hnahnawhnak a pek hna tikah dantatnak an khinh cio. Asinain Ram thawngthawng paruk le Iran tiin hnatlaknak an sermi cu 'dantatnak kan in khinhmi hi kan ngol lai i, nuclear na sermi hi na ngol ve lai' an ti. Cuticun hnatlaknak an tuah.
Asinain US nih dantatnak a khinhmi cu a dang tein a si. Cucu President Obama nih a kum chap than ding in min a thut lo ahcun December 31 ah hin a kum a dih cang ding a si. Iran President Rouhani nih 'US nih a kum a sauhter than ahcun rang taktak in kan lehrul colh ve hna lai' a ti.
Iran Atomic Energy Organization hruaitu Ali Akbar Salehi zong nih 'dantatnak a kan khinhmi an pehzulh than ahcun zawnruahnak menmen in si ti loin fimnak, ralthatnak le ralrinnak taktak he biachahnak kan tuah ve lai' a ti ve.
'US nih a kan chap than ahcun kan lehrul colh ko hna lai' tiah Iran hruaitu sangbik Ayatollah Ali Khamenei nih a chim ve. Ref: TOI.