'Saturday Night Live' timi an tuah i, President thimmi Donald Trump le Kellyanne Conway nawl an cawn hna. Trump nawlcawngtu ah Alec Baldwin a si i, Conway nawlcawngtu ah Kate McKinnon a si.
Trump nih twitter hmang in catial le ca thlah a hman tukmi cu capo seihnak ah an hman. Kellyanne Conway nawlcawngtu a simi Actress kate McKinnon nih Trump nawlcawngtu Alec cu a thawh i, 'president thimmi, media nih na business ah hnahnawhnak an ka pek tuk sual lai ti phan ah twitter ah catial na hmang tuk' a ti.
Trump Nawlcawngtu Alex nih 'a ngaingai ti ahcun cucu ka tuahmi taktak a si lo. Ka thluak hi a that lo caah ka tuahmi a si' tiah Trump bantuk tein a leh. Cun ramchung security nih biahalnak an tuah cuahmah lioah Trump cu tweet in ca a kua lengmang hna. A bawmtu nih an rak mawhchiatnak zong an nawl an cawn rih.
Trump nih a rak zoh lengmang hna tikah a rak celh ve lo tuk! Twitter in a a phomh colh ve hna. 'Ka zoh len ve hna nain zoh awk zong a tha lo, nihchuak zong a si lo, hi naak in a chia deuhmi a um ti lai lo. Ngaihchia an si' tiah a tial.
An nawlcawnnak a donghnak ah cun Trump nawlcawngtu Alex nih Chief Strategist Steve Bannon cu a office chung in a vun auh. Steve cu Grim Reaper timi thuamnak in a rak lut. Cuticun an Trump capo seihnak cu an donghter.
Baldwin nih Trump tialmi cu a hnu ah a vun leh i, a timi cu, 'na tax pekmi kan chuahpiak law kan in caponak kan ngol ve lai' a rak ti. Ref: TOI.