President thimmi Donald Trump nih Mexico ah aa thialmi Company pawl hna cu ralrinnak a pek cang hna. US in Mexico ah aa thialmi company nih cun thilri nan rak kuat/phurh man 35% tax nan pek lai tiah zarhpini ah a nolh than.
Tam piin taxes le business phung kan zorter lai asinain kan ram in ramdang ah aa thialmi company nih tax liam loin US ah kan thilri kan rak kuat/phurh than lai timi hi a hmaan lomi a si' tiah a tweet. Ramdang ah company nan thial zong ah kan luat lai timi i ruat ti hlah u tiah fak ngaiin a vun den cang hna.
Mexico ah thial ding tiah an ruahmi Air Condition Company cu thial than lo ding in Indiana a um than lai. Rian 10000 tluk hrawng ngei an si. Trump le Pence zong thangthat an tong ngai. 'US ah kan rian le company kan chiah ko lai' tiah Carrier nih an chim.
Ramdang ah company thial a miak lonak ding ah Trump nih tax peknak kongah tuah dingmi timhnak a ngei. Ramdang ah company a thial i, US ah motor a siah AC a siah thil dangdang a siah an vun zuar than ahcun 35% tax lak an si lai a ti. Asinain US state 50 chungah an duhnak paoh ah thial hna seh, tax hrimhrim a um lai lo a ti.
A man a fak tukmi palhnak nan tuah hlanah ralrinnak i lak cia u! US hi business tuahnak caah kau piin innka aa ong ko' tiah President thimmi Donald Trump nih a chim.
Asinain House biachimtu Paul Ryan nih cun 'chawlehthal ral' a chuahter lai a ti. Kan tuah bantukin ramdang zong nih an kan tuah ve lai. US hi ramdang he business tuah ti hawi kan si khawhnak ding ahcun biatak tein tax sersiam than kan hau a ti. Ref: NYP.