California i Fresno khua ah pa hngakchia Jose Luis Espinoz 1 thih kongah Kenneth Johnson 30, cu police nih bia an hal i, a phuanmi cu 'a tah lengmang ruangah ka thinhung tuk cang i, a paw ah ka thongh ko' tiah a ti.
Hngakchia zohkhanhtu kum 20 nu (a min langhter lomi) hi Johnson ngaknu a si. A thimi Luis nu hawi a si. Police sinah a chimmi cu innkhaan ka phiah cuahmah lioah kum 7 hngakchia nu te nih ka tapa a thawchuah ti lo tiah a ka chimh a ti.
A rannak in police an auh hna i, 2.40pm ah an rak phan. Hngakchia te cu mah hngal loin a um cang. Sizung ah an rannak in an thlik pi i, an phak pi ahcun a thi cang. An chek tikah chunglei ah khawnnak hma a um an ti.
Police zong nih lainawn a si ko tiah an ti ve. Police nih CCTV an zoh tikah 3pm hlanah innkhan in Johnson a chuah lio an hmuh. An auh i, bia an hal. Asinain Johnson nih cun keimah ka si lo tiah aa pheh. An hal than i, a hnu ah cun a phuan.
Chief Jerry Dyer, Fresno Police nih a chimi cu Johnson le a ngaknu karlak ah hin buainak a um lengmang i, kum thum chung na ngaknu sinah na kal ti lai lo kan timi a si. A ngaknu zong cu hngakchia zohkhanh a rak si ve celngel ve hoi' tiah a chim.
Johnson cu an tlaih nain an thlah than cang. A sualnak tehte dang in hmutu an um lo caah sual phawt awk a tha lo. 'Upadi nih tehte dangdang um loin minung pakhatkhat sualphawt a onh lo' tiah Fresno County District Attorney offic nih an chim. Ref: ABC News.