President thimmi Donald Trump le President Tsai Ing-wen phone chawnhnak nih Taluk cu um thiam loin a vun tuah hna tikah a rannak in Inn Raang pi ah ca an vun tial i, an vun zai colh. 'One China' timi policy kan i tlaih peng ko tiah fianternak an pek colh ve hna.
Asinain Media kip nih rauhnak tampi an chuah. A chanchan in US-Taiwan pehtlaihnak a dai cangmi a thar in nunter than an timh caah maw a si hnga; chunglei ral an thawhter te ko lai lo maw timi ruahnak a vun tam ngai. Taluk nih ralkap thazaang in Taiwan hi a la colh sual te hnga maw timi zong a um.
Russia President Putin nih Trump thangthatnak bia a vun chim ve colh. 'President tuan ding in aa timhtuahnak ah a cawlcangh a tha. Mi thluak tha a si' a ti. Zei tiang dah Taluk-Taiwan-US karlak ah thil a um te lai timi a fiang rih lo. President thimmi Trump lei zong in zeihmanh a chuak rih lo.
Khatlei in President Obama cozah upa lei nih cun Trump foreign policy kongah lungretheihnak le thinphannak an vun langhter ngaingai, asinain Republican upa cu an lungtling ngaingai. A tanglei bantukin thangthatnak an vun chim cio:
Texas Senator Ted Cruz nih twitter in a vun dirkamh colh. Trump-Tsai phone chawnhnak nih 'thanchonnak a vun langhter' tiah a chim. Colorado Republican Sen. Cory Gardner nih a chim vemi cu 'kan hawile he kan i pehtlaihnak le Taiwan he kan i pehtlaihnak thazaang pek chin lengmang ding in President thimmi he riantuan ti ding in kaa tim ve ko' a ti.
East Asia Le Pacific Affair kongah Senate Foreign Relations Subcommittee ah hruaitu a si. A chim thanmi cu 'US le Taiwan pehtlaihnak le kan i hawikawmhnak hi a biapi tukmi a si. President thimmi nih ram hnih pehtlaihnak cungah duhsaknak a ngeihmi a langhtermi cungha kaa lawm tuk' a ti.
'Taluk ah democrcy ram pakhat te kan ngeihmi cu Taiwan lawng a si. Trump le Tsai phone chawnhnak ka thangthat hna. Tsai zong voihnih ka ton cang. US nih pehtlaih kan duh tluk tein anmah zong nih pehtlaih a kan duhmi an si' tiah Arkansa Senator Tom Cotton nih a chim. Ref: ABC News.