ISIS hmunkhur Al-Bab, Syria in chaklei kam cu Turkey ralkap nih fak chin lengmang in an doh hna. Turkey khuapi Ankara in Official nih an chimmi cu 'nai hrawng ISIS kan dohnak thazaang kan pek chin lengmang. Syria in chaklei peng hmunkhur ISIS 226 kan thah cang hna tiah an chim.
ISIS dohnak ah aa telmi hna hi Syrian raltho zong an si i Trukey ralkap zong an si. Syria in chaklei khua al-bab khua hi Syrian raltho nih an kulhnak hna zarh hnih-thum hrawng a si cang. Turkey ralkap nih an bawmh chih hna. 2013 in ISIS nih an lakmi al-bab khua kan dohnak a thangcho chin lengmang tiah Turkey President Erdogan biachimtu nih a chim.
President Erdogan nih US zong fak chin lengmang in ISIS doh ding in a sawm than hna. Raltuknak vanlawng in ISIS a do cuahmahmi kan ralkap zong kan dirkamh hna lai a ti. 'Al-Bab khua lak ding in raltuknak vanlawng kan herh chin lengmang. Ram kip nih kan rian tlamtling tein kan tuan awk a si tiah a chim.
'ISIS a dohmi kan ralkap hna hi a herh ning in raltuknak vanlawng in kan bawmh hna lo ahcun a poi tuk lai a ti. Turkey ralkap he Free Syrian ralkap he Al-bab hi an dum cang. Atu tiang ah Al-Bab khua an dohnak lawng ah ISIS an thah cangmi hna hi 1,3000 hrawng an si cang. December 22 ah khan ISIS nih fak tuk in an doh ve hna caah Turkey ralkap zong hnulei an soh.
Turkey tank pahnih, hriamnam le a dangdang an lakpiak ve hna. Turkey ralkap 70 kan thah hna tiah ISIS news nih a chim. Turkey ralkap mei in an khanghmi video zong an rak langhter. Al-bab khua a zam takmi hi Turkey le Europe ram ah tam tuk an um cang ti a si. Ref: The sun.