Mipem nan kham hna lai tiah President Trump nih nawl a chuahmi a dirkamh lo caah Justice Department secretary (Attorney General) Sally Yates cu Trump nih a rian in am phuah diam. Amah ai ah Dana Boente a thim i, 'President nawl chuahmi nan dirkamh lai tiah Justice Department cu Dana nih nawl a pek colh hna.
Dana Boente hi President Trump nih caan karlak caah a thim chungmi a si i, Senator Jeff Sessions hi an thim te lai tiah zumh a si. Senate Judiciary Committee nih nihnihni ah vote an thlak lai i, tu zarh dongh leiah an fehter te lai. Yates hi President thing Obama nih a rak khanhmi a si. Yates nih a chimmi cu President Trump mipem khamnak nawl a chuahmi hi phungning a si le si lo ka thei lo a ti.
'Justice Department secretary (attorney general) ka si bantukin ka tuanvo cu JP hi phungning tein rian a tuan maw tuan lo timi zohkhanh lawng si loin upadi kan sermi hi thil sining zoh dih hnuah tuahmi a si maw si lo timi zoh chih zong hi a si' tiah Yates nih a chim. A chim thanmi cu 'cu pinah biaceihnak zung ah kan chuah pimi dirhmun hi phunghram hi a kal ti maw kal ti lo timi zoh chih zong a hau' a ti.
Inn Raang lei nih cun fak ngaiin Yates cu an soisel i an mawhchiat. 'United States miphun runven ding in upadi kan sermi a mongtu Department of Justice a leirawi bia a si. President nawlchuahmi tling tein a tlinter awk a si an ti. President Trump nih kan hnu zarh ah a president nawlngeihnak in mipem khamnak min a thut.
Ni 120 chung US ramchung ah refugee paoh kan luhter hna lai lo timi le Muslim le Africa ram pasarih Iraq, Iran, Libya, Syria, Sudan, Yemen le Somalia hna cu US ah thla 3 chung an lut rih lai lo tiah min a thut. Asinain President nawlchuahmi tuanvo a latu ding Justice Department nih tuanvo an lak lo caah Yates cu a rian in phuah a tong diam! A lungkhon pah caah a si ko.Ref: VOA News.
Iraq Minung Pahnih Nih President Trump Le A Cozah Taza An Cuai Hna
--------------------------------