Mosul ah Iraq ralkap nih ISIS ralkap pathum an tlaih hna. Lam an hnuh hna i, zoh ah hin zaangfak taktak an si ve ko. Zeitluk in misual hmanh hi an caan a phak ve cang hnu ahcun zaangfak an rak si caan cu a um ko. Kan that hlah u tiah an nawl chih len ko hna nain san a tlai lo.
An video zoh ahcun zaangfak taktak an si. Zeitluk in dah an nawl hna i, thih an tih timi hmuh khawh an si. Asinain Iraq ralkap nih hmuah chih in an kah thiamthiam hna. Mipi cung, nu cung le hngakchia cungah an tuahsernak vialte an philh khopiak ve hna lo. An sual man cu an liam a hau cang tiah Iraq ralkap zong nih an ruah.
An tlaih hna i lam ah an hnu hna. A chuih pah hna. An den pah hna i, an ke in an hnu chih hna. Thisen in an khah dih hnuah pakhat hnu pakhat in an kah hna. Mosul in nichuah lei kam paoh cu ISIS kut in kan luatter dih cang tiah Iraq Prime Minister Haider al-Abadi nih a thanh hnuah ISIS pathum an tlaihnak le an thahnak video cu hmun kip ah an thlah.
Prime Minister Haider al-Abadi nih teinak bia a chim hnuah 'kan hero hna, a rannak in a tangmi zong luatter than rih u, a hleiin Mosul in Nitlak lei kam vialte zong nan luatter than dih lai' tiah Iraq ralkap a forhfial hna. Nitlak lei kam ah a ummi ISIS lakah hin mipi 750,000 hrawng an um lai tiah zumh a si.
Nan zam i, kan ral nan bawmh hna ahcun nan hngawng kan in tan hna lai; nan chungkhar in kan in thah hna lai tiah a phunphun in ISIS nih mipi cu an thihpheih hna. Iraq ralkap nih ISIS an thahnak video kan langhter lo, zeicatiah cheukhat caah tihnung deuh a si caah langhter loin a ca lawng kan rak tial. Ref: The sun.