North Korea nih a chimmi cu North Korea nih zeitik caan poah ah ramdang, a hleiin US a kap khomi missile (intercontinental ballistic missile) hneksak ding in timh cia kan si cang tiah a phuan. North Korea hruaitu Kim Jung-un nih cun President thimmi Donald Trump he biaruahnak ngei ding in a duhnak a rak langhter cang.
Asinain kum thar ah a chimmi cu US ram laicer ah nuclear a kap khomi missile hnaseknak ding in kan nai tuk cang tiah a phuan. Expert nih an tuak ning ahcun US a hrocernak hna a si an ti. Khatlei in Trump he biaruah a duhnak zong a langhter i, khatlei in zei poah kan ngamh cang timi a langhter duhnak zong a si an ti.
North Korean foreign minister biachimtu nih zarhpini ah a chimmi cu 'US ruangah nuclear a phur khomi missile kan sernak a si. Zei bantuk a tlun hmanh ah kanmah mawhchiat ding kan si lo. US mawhphurh lawng te a si' tiah fak ngaiin a chim. US defence secretary Ash Carter nih 'a tih ngaimi hrocer a si. Kan hawile an siah kanmah kan siah a kan kah ahcun kan kahpiak ko hna lai' tiah a chim.
South Korea le Taluk nih cun 'North Korea hrocernak cu an vun mawhchiat len. Nan hneksak cicet ahcun fak chin lengmang in dantat nan si ko lai tiah ralrinnak an pek ve hna. North Korea nih ralrinnak kan pekmi a zulh lo i, a missile a hneksak ahcun International Community nih fak taktak in dantatnak a in than lai' tiah S. Korean defence minister biachimtu Moon Sang-gyun nih a chim. Ref: CNN.