Russian hi US thimnak ah aa thlakmi an si ko. Anmah ruangah Clinton a sung ko tiah an phuan hnuah President thimmi Donald Trump nih twitter in ca a tial len hna. 'Russia le America pehtlaihnak hi a thami a si. US zong nih kan thathnem pi dingmi an si' a ti.
'Russia he kan i pehtlaih ahcun a tha lai, a chia lai lo. Mihrut lawng or a molhmi lawng nih Russia he pehtlaih hi a tha lo an ti lai' tiah nirukni ah a tweet. Democratic National Committee le Clinton campaign chairman Podesta e-mail an hack hna i Wikileaks sinah an pek tiah US ramchung sungthoh hruaitu James Clapper nih a chim.
James Clapper nih a chim thanmi cu 'Russian hi UNited States kan nunnak ca tiang ah a tihnungmi an si' a ti. Sungthoh bu lei nih fiang tein an phuan hnuah President thimmi Donald Trump nih a tialmi an si ve. Trump nih a tial thanmi cu 'President ka si hnu in cun Russia nih voi dang vialte nak in a kan upat deuh cang lai' a ti.
Trump nih a peh than rihmi cu 'Russia he rian kan tuan ti lai i, vawleicung ah kan tonmi buainak tampi kan phisin khawh lai i, thil tha zong tampi kan chuah pi khawh lai' tiah a chim chih. Trump nih Democratic Party zong fak ngaiin a vun soisel than hna. 'Russian an i hack termi hi cu an daithlan tuk ruangah a si. Republican party nih cun tha tuk in kan i runveng kho' tiah a chim.
'Anmah le anmah mualphoh zong a si i, tha tein an i runven lo ruangah a si' a ti. The Wall Street Journal nih a tial ning ahcun Trump nih sungthoh bu office sersiam than ding in aa tim. Indiana Senator thing Dan Coats hi ramchung sungthoh director a thim te lai tiah zumh a si. 'America himnak caah riantuan tluk in a dang a biapi deuhmi a um ti lo. A herh ning in rian kan tuan lai' tiah Coats nih a chim ve. Ref: TCP.