Mizoram in aa thawhmi Menashe miphun cu tluang tein nithumni ah Israel, Ben-Gurion Airport an phan. An zate in minung 100 leng an si. Ben-Gurion Airport ah Jew miphun cawnpiaktu lu bik a simi Rabi nih a rak dawn hna.
Airport in an tum i, lengah an rak chuah cu an lunglawmhnak mitthli zong a tla dih. Authawng le hlasak thawng lawng tein Airport cu a khat. Bible tuanbia thei nih an chimmi cu a luan cia 2,700 hrawngah Assyrian Siangpahrang nih Thlang Israel a lakmi chungah a vakvaimi Jospeh fapa Menashe cikor an si an ti.
Mizoram ah a tangmi Bnei Menashe community nih pupa ram Israel an tlun than khawhnak cu Shavei Israel thawngin a si. Journalist Micheal Freund nih a dirh i a hruaimi a si i, India ah Jew miphun a tangmi kirnak kongah tuanvo latu a si.
Atu tiang ah minung 3,000 hrawng Israel ah an kir pi cang hna. 7,000 lak ding an um rih, asinain tu kum chungah cun minung 700 lawng kan lak rih hna lai a ti. Kum khat chungah kan lak a tam cem an si lai tiah Freund nih a chim. Israel ah kan kir pi dih hna hlan tiang kan i din lai lo tiah a chim chih.
Tutan minung 100 leng an laknak ah amah hrimhrim zong nih a tel pi hna. Guitar he khuang he an rak don hna i, an i nuam kho tuk hna. Ref: CBN News.