President Trump cu Russia cungah a nem tuk tiah fak tuk soisel a tong i, President Trump le Russia president Putin karlak ah pehtlaihnak zeimaw tiin a um ko lai tiah mi kip nih lunghrinh cio a si. Asinain a caan a vun phan i, President thing Obama naak hmanh in President Trump hi Russia cungah a cian deuh lai tiah zumh a si cang.
Ukraine ramchung Donetsk in chaklei Avdiivka khua hrawnghrang ah Ukraine ralkap le Russia dirkamhmi raltho pawl an i kap than. Fak ngaiin kahnak a chuah than tikah nizan ah UN meeting an thu hna i, President Trump nih UN ah a thlahmi ambassador Nikki Haley biachim cu a cian i, a hrang ko. Ukraine ram in Crimea nan lakmi hi nan pek than hna lo ahcun US nih dan kan in tatmi hna kan ngol lai lo a ti.
A sullam cu Ukraine sinah Crimea hi pe/khirh than hna u ti a si ko. 2014 ah Russia nih Ukraine in Crimea cu a lak. UN ah Nikki nih a chimmi cu 'Crimea nan khirh than hna hlan chung poah cu dan kan in tatmi kan ngol lai lo' tiah fiang ko in UN ah a phomh hna. Campiagn an tuah i thimnak a dih kaa hrawngah khan cun Trump hi Russia cungah a nem tuk te lai tiah ahopoah nih lunghrinh le zumh a si.
Asinain UN ah cun Russia ningcang lo cawlcangh hi kan cohlang kho lo. Fak piin Ukraine cozah kan in dirkamh hna a ti. Nikki nih a chimmi cu 'Russia he kan i pehtlaihnak thatter kan duh, asinain Ukraine in nichuah lei thil umtu ning nih Russia mawhchiat awk an phurhter hna bantukin fiang te le thawng ngaiin kan in mawhchiat hna' a ti.
Nikki nih a chim thanmi cu 'kum thum dengmang Russia um hnawhnak le ralkap tlangtlaknak in Ukraine mipi nan tuar tuk. US nih kan in um pi ko hna. Hi buainak vialte hi a dongh hrimhrim a hau' a ti. Russia le a dirkamhmi raltho hna nih Ukraine cozah nan upat hna lo i an ram sinak nan upatpiak hna lo ahcun buainak hi a dong kho lai lo' tiah ralrinnak a pek chih hna. 2014 in a tu tiang ah 10,000 hrawng an thi cang i, cu chungah 2,000 hi mipi an si. Ref: The mirror.
US Ambassador Nikki Nih UN Ah Russia A Phomh Colh Hna
-------------------------------------