New York khuapi i hmun zeimawzat ah bompuah a rak timtu Egyptian Muslim tlangbawi pa cu nirukni ah US thonginn ah a thi cang tiah US thonginn lei upa nih an chim. 1993 ah World Trade Center an rak puah i, minung 6 an rak thih lio zong ah aa telmi a si.
A hnuah UN Headquarter le New York Khua chung i hmun zeimawzat ah bompuah an rak timh than. Asinain an rak tlaih manh. US a doh tuknak ruang cu amah hi secular phunglam a doh ngaimi a si bantukin Egypt hi US he aa pehtlaihnak ruangah secular lei lam ah a pialter chin lengmang cang tiah a ruah.
Mah ruangah cun US hi fak piin a dohnak a si. A hngakchiat tein diabetes zawtnak ruangah a mit pakhat a rawk i, atu a thihnak zong cu a hngakchiat tein aa than pimi zawtnak in a si. Muslim sianginn ah a rak kaimi a si tikah Muslim biaknak le phung hi tihngamh in a tanhmi a si. A hnuah Afghanistan ah an i thial i, tapung hruaitu Osama Bin Laden he pehtlaihnak an ngei.
Tapung a luh hnuin US ah a kal i, fak piin doh aa tim, asinain 1995 ah an tlaih i, a thih tiang thonginn ah a hren. Kum 78 a si cang. A fapa nih Reuters News Agency ah 'US nawlngeitu nih kan pa thih thawng a kan thanh cang' tiah a chim. Chan pi chan hnih chung US Federal thonginn ah a um ko nain Abdel-Rahman hi Muslim ram, a hleiin Egypt ah zultu tampi a ngei rih. Ref: VOA News.