A pa (President Trump) bawmh ding in Inn Raang ah a fanu Ivanka Trump zong rian a tuan cang lai tiah official tein phuan a si cang. Asinain Inn Raang nih an chimmi cu 'lahkhah pek loin President bawmtu a si lai' a ti. Asinain mipi lei nih an thangchiat ngaingai hna.
Ivanka Trump pasal Jared Kusher zong President Senior ruahnak petu ah rian khanh a si cang. Atu ah Kusher nupi Ivanka zong a pa bawmtu dirhmun in rian khanh a si than. Chungkhar pakhat nih America uk le hruai a kan timh cang tiah mipi cheukhat cu an zai tuk cang.
Cun Trump cozah nih 1967 ah rak sermi thleidannak upadi an buar maw buar lo timi an zoh cang. Upadi nih a tialmi cu 'mipi caah riantuantu official - President in a niam bik tiang - nih a chungkhar rian a pe hna lai lo or rian a khanh hna lai' a ti.
Upadi nih a tial thanmi cu 'upadi kalh in rian peknak/khanhnak a um ahcun federal cozah nih lahkhah a pe lai lo' a ti. Cucaah Ivanka Trump a siah a pasal Kusher a siah lahkhah pek loin a tuan ding an si. Asinain Justice Department nih an chimmi cu 'Senior ruahnak petu ding ah Kusher an khanhmi cu 'thleidannak upadi a buar lo' a ti.
Ivanka Trump cu lahkhah pek loin a tuan lai. Ivanka hi President chungkhar an si hlan hrimhrim in a pa business tuahnak ruahnak petu dirhmun a tlaihnak a sau cang. Nu fim ngaingai le thil ti kho ngaingaimi a si. President aa cuh lio zong ah campaign chung vialte ruahnak petu dirhmun ah a rak um lengmang.
President bawmtu dirhmun in rian khanh a si hnuah Ivanka Trump nih a chimmi cu 'Inn Raang ruahnak petu hna he zumh in kan tuan lai. Ka si khawh tawk in kaa zuam lai' tiah a ti. Ref: CNN.