Pakistan mipem London khuabawi Sadiq Khan cu London mipi an tuar le an thinphan le an thih-loh cuahmah lioah dai tein a rak um. Mipi leiin fak tuk in soiselnak a ton cikcek hnu lawng ah a rak holh len ve.
'Minung pakhat nih twitter in a rak tialmi cu 'khuabawipa hmurka kan thei rih lo. A hna aa chehtermi cu lungdong ngai a si' a ti.
Minung pakhat nih a vun tial thanmi cu 'khawika ah dah Sadiq Khan a um khun' a rak ti ve.
Minung pakhat nih a tial thanmi cu 'Sadiq Khan hi a holh kho rua lo. Kan i uan pi tukmi kan khuapi an doh lioah zeidah na tuah. Khua rak ruat' tiah a tial.
A dangdang zong nih an rak phomh thluahmah. A hnuah video in a biachimnak a vun thlah than. 'Tapung riantuannak nih London minung kan ral a kan chiatter lai lo. Nihin ah London nih Parliament pawngah tihnung tukmi tapung dohnak kan tong' tiah a chim.
A chim thanmi cu 'ngaihchiatnak a tongmi chungkhar kan in ngaihchiat pi hna. Police le kan khua a rungvengtu nan dihlak cungah kan lunglawmhnak langhter zong kan duh. Nan riantuan aa dawh, a rang i, a caan hmaan te ah rian nan tuan kho hna' tiah thangthatnak le hnemhnak bia a chim.
'London hi vawleicung ah a lianngan cemmi khua a si. Harnak pek an kan timh lioah lungrual tein kan um hna lai. Tapung riantuannak nih kan ral kan chiatter hrim hlah seh' tiah a chim chih.
Motor in Westminster Hlei cungah mipi a pah hna i minung 5 a that i 20 a hliamh tu hna hi ISIS he aa tlaimi a si. Mipi a pah hna hnuah a chuak than i, Parliament pawng ah police pakhat thi lak in namte in a sawh. Police nih thi lak in an kah colh ve. UK security nih lunghrinh minung 8 an tlaih cang hna. Ref: The Express.