Kan Bawipa Jesuh Khrih a ruak an vuinak thlaan cu dawh taktak in Jerusalem ah an tharchuah than cang. A tharchuah thannak ah US dollar in million 3 an dih. Tharchuahnak caah tangka a rak hlutu hna hi America hrambunh World Monuments Fund (NGO) le Jordan siangpahrang Abdullah II an si.
Khrihfabu leiin Greek Orthodox Church, Armenian Orthodox Church le Roman Catholic Church hna an si. Nithumni ah onnak conglawmhnak puai sunglawi taktak in an tuah. Khrihfami a thongthong in a rak ra hna. Jesuh Khrih thlaan a rak satu hi Roman siangpahrang Constantine I a rak si i, kum zabu 4 ah a rak sak.
Kum saupi a vun kal deuh tikah cun a hlun i a thing chin lengmang. A cim ding zong a lo cang. Kum zabu 19 ah an remh than. Greek Orthodox Khrihfabu pacan Theophilos III nih cun 'chan tampi a luan hnu le a kal hnuah Jesuh thlaan thiang kan tharchuah than' tiah mipi hmai i onnak an tuah lioah a chim.
A chim thanmi cu 'hihi kan ram hmun thiang Jerusalem kan laksawng lawng si loin vawleicung kan laksawng sung bik a si' a ti. Jesuh thlaan hi mei nih a rak kangh dih i, 1810 ah an rak sak than. Kum le caan a kal lengmang tikah a rawk chin lengmang cang.
Cu tikah Israel nawlngeitu nih a him ti lo tiah an remhter than hna. Ni kum May thla in remh an thok i, Greece khuapi Athens National Technical University professor Antonia Moropoulou nih a hruai hna.
Nizan nithumni ceo ah khan onnak an tuah khawh. An tamh ning le an remh ning a chim in an chim kho lo. Aa dawh kho tuk an ti. Million pathum dih in remh cu aa dawh lo awk a tha lo an ti. Mah hnu cun zoh a duhmi paoh nih rak len le zoh khawh a si cang lai. Ref: NYT.