Lai ngaknu hlasak zong a thiam bak i, a mui zong aa dawh bakmi Sui Ngun Rem nih 'Vanram Hluan' hla a sakmi cu a hmaan lo ngai. Hlaphuahtu nih a perh tuk ko. Laimi hi hla kan phuah tikah kan porh deuh tawn lengmang.
Tluang Za Uk Group nih hla an rak phuahmi zong ah 'Jesuh he cun hell ram zong a nuam ko lai' an rak ti. A si thiam lo dingmi tahchunnak hlaphuah a si. Tachunnak hi a phunphun in lak khawh an si nain a um thiam lo dingmi tahchunnak lak hi kan hmang theo lengmang tawn. A hmaan lo tinak si loin an porh deuh tuk.
'Vanram Hluan' hla an phuahmi zong hi a hmaan lo taktakmi a si. Ngaknu le tlangval duhnak a langhter sawhsawhnak a si ko nain tahchunnak a lakmi hi a porh deuh ngaingai. Sullam a lak duhmi hi kan zumhnak vanram theo a si ko lai tiah ka zumh. 'Vanram' ahcun chambau ti hi a um ti lo.
Vanram ahcun kan ngaknu le kan tlangval zunngaih timi zong a um ti lo. A tlingmi vanram a si caah cun a tlingmi nunnak, nuamhnak le dawtnak le zalonnak in a khatmi vamram a si. Cucaah 'nang lo cun vanram hmanh a chambau ko hnga' timi cu hlaphuahtu nih a porh deuh ngaingai ko.
Hlaphuah tik zong ah hin sullam ngei deuh in hlaphuah hi a tha. A hla zong ngai cio u law zeitin dah nan ruah cio. Zukcawl an i zeih ning le an cawlcangh le a zeihtu le edit tuahtu leiah cun an thiam lawlaw. Laimi nih hi tluk in zukzawl tuah thiam cu upat tlak an si. An nawl zong cawn cio ding an si. KAHIN ZOHNAK.