'Nang Lo Cun Vanram Hmanh A Chambau Ko Hnga' timi hla konghe pehtlaiin kan tialmi ah mipi leiin ruahnak nan vun chim ciomi kan hmuh i kan i lawm. Nan ruahnak nan rak langhtermi ah fak deuh in a langhtermi zong nan um i, dawh tein a langhtermi zong nan um. Ruahnak le hmuh ning langhter thiam hi a biapi ngai.
Hla tlangtar hi 'Vanram Hluan' ti a si i, a chung hlacang pakhat ah 'nang lo cun vanram hmanh khi a chambau ko hnga' timi zawn te hi kan soiselmi a si. Khirhfami nih kan tum vanram cu kan sunhsak tukmi a si i, kan ruahchannak lian bik zong a si. Thih zong kan tih ti lonak cu kan tum vanram ah kan ton dingmi ruahchannak hna ruangah an si.
Cucu Bible nih hitihin a kan chimh, 'tah a um ti lai lo; ngaihchiat a um ti lai lo, fahnak a um ti lai lo, nihin ah kan tonmi vawlei nun harnak a um ti lai lo' tiah a kan kamh (Bia. 21:4). Pathian hrimhrim nih an mitthli a hnawhpiak cang hna lai tiah hnemhnak bia a kan chimh. Bible nih fiang tein a kan chimhmi a si. Cucaah 'nang lo cun vanram hmanh a chambau ko hnga' timi cu Bible he aa kalh deuh ko kan tinak a si.
Hlaphuah ning hi aa dang cio i, cheukhat nih cun 'a dawtmi ngaknu a duhnak le a dawtnak langhternak caah 'arfi le thlapa hmanh kan lakpiak lai' tbk hlaphuah zong an um. A duhnak le a dawtnak a langhternak sang bik pakhat a si. A hmaan i a sunglawi tukmi duhnak le dawtnak langhternak biachim phun khat a si.
Asinain 'nang lo cun vanram hmanh a chambau ko hnga' timi cu duhnak le dawtnak langhter phun khat a si ve ko nain Bible nih fiang tein a kan chimhmi he aa kalh deuh ko kan ti duhnak a si. Fiang tein Bible nih pei vanram kong cu a kan chimh ko cang cu! 'Chambau' a um ti lomi vanram cu zeiruangah dah kan chambauter hnga? Kan chim duhmi cu Bible nih fiang tein a kan cawnpiak he aa kalhnak zawn kha kan chim duhmi a si.
A dang ah kan soiselnak a um lo. Hlasatu Sui Ngun Rem hi hlasak zong a thiam i a mui zong aa dawh. Zukcawl an i zeihmi hrimhrim khi an thiam kho tuk. Hlaphuahtu zong a thiam lawlaw. A hlaphuah mi kip an tha dih i, chan thar Lai mino lam sialtu pakaht ah kan ruahmi a si. Biafang hmanmi te lawng khi sia a rem lo deuh i a si. Kan siarem lonak kan langhternak ah hlaphuahtu le hlasatu lung kan in fahter sual hna ahcun kahin ngaihthaim kan in hal hna.
Hi bantuk hlaphuah thiam hi Lai mino hrimhrim nih uanthlaar pi phu le upat tlak a si. A ngaingai ti ahcun Laimi kan Justin Bieber, Taylor Swift le Melly Cyrus an si. Laimi nih kan hlaphuah thiam le hlasak thiam kan i uanthlaar pi hna bantukin kan media zong nih an i uanthlaar pi ko hna. Hlaphuahtu Van Biak Lian nih fianternak a tuahmi rel na duh ahcun KAHIN HMET.