Zarhpini zanlei ah lunghrinhmi Steve Stephens nih lam cungah tarpa cu a lu ah pistol in a kah. Video ah a chim thanmi cu minung 13 ka thah cang hna. A dangdang zong ka thah rih hna lai tiah a chim. A kahmi tarpa Robert Godwin hi kum 74 a si cang.
Ohio, Indiana, Michigan, New York le Pennsylvania hrawngah hin a um lai tiah an zumh i Police nih ralrinnak zong an chimh hna. Cleveland police department nih a hmaanthlak le a dangdang zong mipi theihternak caah an chuah cang.
Steve Stephens umnak a kan chim i kan tlaih khawh ahcun $50,000 kan in pek hna lai an ti. An thapmi tangka zong a tam ngaingai. Zeitluk in dah tih a nung timi a lang. Zarhpini zanlei ah Pennsylvania i Erie khua ah a phone signal an tlaih nain atu a umnak taktak an thei kho rih lo.
FBI le Police upa nih an chimmi cu 'hmun dangdang zong a kal kho chin lengmangmi a si' an ti. US ramchung kip ah minung kan chiah dih cang hna. A umnak hmun hi a bi chin lengmang cang tiah US Marshall Peter Elliot nih a chim.
Tarpa a kah lai i bia a halmi cu 'zaangfahnak in rian kan fial kho hnga maw? Joy Lane min na chim kho hnga maw?' tiah a hal. Tarpa nih cun 'Joy Lane' tiah a chim. Mr Stephen nih a chimmi cu 'Yeah, amah nu ruangah hin hi thil na cungah a tlunnak a si. Kum zeizah dah na si?' a vun ti ah khin a kah colh.
Tarpa nih a kah lai ah aa putmi plastic in aa phenhnak hmanthlak zong a vun tar. Joy Lane hi a ngaknu a si i, kum tam ngai kan rak i duh tiah Joy Lane nih CBS News ah a chim. Joy nih a chimmi cu 'ka lungtha lo tuk. Ngaihchiatnak a tongmi chungkhar caah thla ka campiak hna. Stephen hi mitha a si. Aho poah nih an theih dihmi a si' tiah a chim.
A chim thanmi cu 'mitha a si, dawtnak a ngei. Keimah zong a ka dawt i ka fale zong a dawt hna' tiah a tial. A nu nih CNN ah a chimmi cu 'a ngaknu hi aa hruh pimi a si. Mah ruangah a kahnak hna a si. A ngaknu le a nu nih kap ti hna hlah an ti lawng ah a ngol lai tiah Maggie Green nih a chim. Ref: BBC News.