President thing Bill Clinton chan ah North Korea nih nuclear ser hram a thok. Biaruahnak le nemte in an rak chonhbiak hna. North Korea nih ngol hlei a tim lo. President thing George W. Bush a rak ra than i, ram ruk kawmh biaruahnak an ngei than, asinain a ngol hlei lo.
2006 ah a voikhatnak nuclear a hneksak. President thing Obama a rak ra than i, Obama chan ah voili bakte a nuclear a hneksak manh. Tuaktan kho nih an chim ning ahcun 2020 in cun North Korea nih US a kap khomi missile a ngei cang lai tiah an chim. Obama chan chungah caan tha a rak la manh tuk.
South Korea i bia a chim lioah Pence nih cun 'a chambaumi kan policy vialte kan hlawt dih cang hna lai. Biaruahnak in a siah dantatnak in a siah a let hnih in North Korea cungah kan hrang cang lai. Kan duhmi cu daihnak he North Korea kong hi sersiam kan duh' tiah CNN sinah a chim.
Kan hlawhtlinnak ding ahcun Taluk hi kan i bochan cemmi a si. President Xi he an i ton hnu cun President Trump zong a thatho tuk. Taluk nih North Korea cungah a cawlcanghmi kan hmuh cang, asinain tam deuh in cawlcangh rih a hau ko' tiah a chim chih.
Taluk Foreign Ministry leiin biachimtu Lu Kang nih nikhatni ah a chimmi cu 'North Korea nuclear kongah kan zapi tein kan i tel a hau. Daihnak in sersiamnak tuah hi kan herhmi a si' tiah a chim.
Korea ram a rak tlawn cu Pence caah lunglawmhnak ngai zong a si. Korea ral a rak thawh lioah Mike Pence a fapa Lt. Edward J. Pence zong ral a rak domi a si. Korean raldohnak ah laksawng Bronze Star zong a rak hmumi a si.
'Korea ram ka rak tlawn cu ka caah a sunglawi tuk. A luan cia kum 64 ah ka pa nih Bronze Star a rak hmu. Ka office in nitlak lei pang ah ka thlai peng ko rih' tiah a chim. 'Battle of Pork Chop Hill' timi ral an rak dohnak in a hmuhmi a si. Keimah ca a siah ka chungkhar ca a siah sullam a ngei tuk.
'Ka pa, US ralkap le South Korea ralkap hna nih nunnak pek in ral an rak doh i, keimah chan tiang aa pehtlaihmi cungah ka pa zong aa lawm tuk lai. South Korea cungah US nih pumpeknak kan ngeihmi nihin tiang aa thleng lo' tiah Vice President Mike Pence nih a chim. Ref: CNN News.