US Vice President Mike Pence nih nikhatni i South Korea a tlawn pah ah fak taktak in North Korea a hro hna. 'US ralkap thazaang hi hneksak kan thim hlah u' tiah fiang ko in a chim. North Korea nih missile a hneksak i a tlolh thaizing nikhatni ah a chimmi a si.
'Syria kan kahmi le Afghanistan i ISIS kan kahmi nih kan ralkap thazaang le kan President thar Trump khohchonak an langhter cang. Zei bantuk hmanh in kan doh hna seh law kan tei hna lai. Nuclear a siah a dangdang in a siah kan doh hna hmanh seh law lau lengmang in kan lehrul colh hna lai' tiah a chim rih.
A chim thanmi cu 'North Korea kong hi cabuai cungah an um dih cang' a ti. A chim duhnak cu a herh ahcun ralkap zong in kah khawh an si cang; a herh ahcun sipuaizi tuahnak lam zong in phih than khawh an si cang tbk hna khi an si. Sau tuk i leksuai ti hlah seh; a cei tuk sual lai ti khi Pence chim duhmi cu a si.
Nai hrawng cu US nih ruah lo piin North Korea hi a kah te lai tiah bia a chuak lengmang. Pence nih a chimmi cu 'South Korea he kan i ceih lengmang lai. Hmun khat ah biachahnak kan tuah ti lengmang lai a ti. Kan kah hrimhrim lai timi cu a chim lo. Thilsi ning kan zoh lengmang rih lai a ti. Nikhatni zing ah North Korea le South Korea ramri lei zong a leng.
Hi hmun hi kap hnih ralkap zong nih tongh lo ding timi hmun an si. Meng hnih le cheu kau a si i, a sau hi meng 160 a si i, kap hnih ralkap nih anmah lei cio an congh veve. Tha le rem tuk in runvennak an i ngeih veve. 1953 ah an rak dirhmi a si. Kap hnih raldohnak zong a rak donghter hna.
Hi hmun cu 'zalonnak ramri' ti zong in an auh. Pence zong nih a va zoh. North Korea kong a chim thanmi cu 'an cawlcanghnak thalo nih kan lungsaunak caan a dihter cang' tiah a chim. 'Taluk nih North Korea cungah zeimaw tel cu a tuah ko lai tiah President Trump zong ruahchannak a ngei ko' tiah a chim chih.
North Korea nih Taluk hi aa bochan bakmi a si tikah Taluk mithmai hi US nih a zoh cuahmah lio a si. Taluk nih zeihmanh a tuah lo ahcun an chim lengmang cang bantukin North Korea hi an phomh te lai. Ref: CNN News.