Zahan zarh ah Austrealian Foreign Minister Julie Bishop nih 'kalsual Norh Korea hi dantat than ding in kan ruah cuahmah lio a si. North Korea kongah zeitin dah khua kan khan lai timi kongah zei poah hi kan cabuai cungah an um dih cang. An tuahsernak hi cohlan awk an tha lo' tiah a chim.
North Korea nih a vun lehmi cu 'Australia (Canberra) nih mitcaw bantukin US kalnak lam a zulh lengmang ko i, kan ram a kan hlat chin lengmang ahcun kan missile thinhunnak a tuar te lai' tiah an vun leh colh. 'Anmah le anmah an i thah bantuk a si te lai' tiah an chim chih.
Julie Bishop nih North Korea missile hrocernak cu 'a rawk chin lengmang cangmi nan ram kong tu hi nan lungretheih pi deuh ding a si. Tihnungmi nan hriamnam naak cha cun kum tam tuk chung harsatnak a ing cangmi nan mipi caah hin riantuan deuh u' tiah a phomh colh than ve hna.
Bishop nih a chim thanmi cu 'North Korea nih ramdang a kan hrocer lengmangmi hi a sawhsawh a si ti lo. Phungning loin nuclear hriamnam ser an timh lengmangmi le missile an ser lengmangmi hi an donghter a hau ko. Inn pa ram hna caah thinphan dai lo an si i, hitihin kan kalter peng hna ahcun Australia ca tiang ah tihnung an si lai' a ti.
Australia's Prime Minister Malcolm Turnbull nih 'North Korea hi an tihnung cang' tiah Taluk zong na rengh deuh a hau ko lai tiah a forhfial cang. North Korea nih nuclear a ngeih lonak ding ah US le Australia cu fek tein riantuan ti kan si. North Korea hi kan ram pawngkam caah tihnung ngai a si ko ti. Ref: The Express.