Nilini zan ah US nih Syria Airbase an phomh. Taluk President Xi Jinping nih President Trump a tlawn lio celngel a si. Cu chung vialte cu dai tein Taluk media cu an kaa an cip, asinain US in an President Xi a chuah cangka in nirukni ah Syria an kahnak an phomh colh.
Ningaini rawl an dum ti lioah President Trump nih Xi cu Syria an kahnak a chimh. Taluk ramchung media Xinhua nih a tialmi cu 'Syria an kahmi cu a ralchiami politician hrocernak sawhsawh a si. Syria a kahmi hi Russia tanhtu a si tiah an soisel lengmangmi teinak caah a tuahmi a si tiah an tial chih.
Ramdang kongah ralkap in tlangtlak hna lo ding hi Taluk nih an duh. Cheukhat tuaktan kho nih an chim thanmi cu Taluk President Xi nih a tlawn lioah Syria an kahmi cu hrocernak phun khat a si. Russia dirkamhmi Syria hmanh a kah ahcun Taluk dirkamhmi North Korea zong a kah than khawhmi a si an ti.
Syria a kahmi hi Taluk le North Korea a kan cawnpiaknak a si tiah a ruatmi zong an um. Trump le Xi nih North Korea kong zong an ceih chih. Secretary of State Rex Tillerson nih a chimmi cu 'North Korea cawlcangh hi tihnung ngai a si' tiah kap hnih in an hmuh veve ko a ti. North Korea chak hi na rengh lo ahcun US nih kanmah tein tuanvo kan lak cang an ti.
Taluk media nih North Korea kong hrimhrim a tial lo. Trump le Xi nih biapi ngaiin an ceihmi a si nain an hrial diam. Syria an kahnak kong lawng te an chim. 1986 lio i Lybia an rak kahnak le 1998 i Sudan an rak kahnak tiang in an coih than dih. 'US nih ramdang a kahmi hna hmang in bia a chim phun khat a si' tiah an tial chih.
Tillerson nih a chim thanmi cu 'Trump nih Xi a chimh lioah hin Xi nih a theihthiam colh ko, zeicatiah sivaidat a hmangmi cu dantat phu an si ko' a ti tiah a chim. Shanghai i Fudan University ah Professor a tuanmi Shen Dingli nih a chimmi cu 'Syria nih nuclear ngei seh law a kap ngam lai lo. Chemical le nuclear cu a dang tukmi a si.
Chemical bom nih cun minung tlawmpal lawng a thah khawh hna i nuclear nih cun a thongthong in a thah khawh hna' tiah a chim. 'Taluk cu kan i lawm tuk ko. Zeicatiah Middle East ah US muihmai a hnawm cang lai. Syria nih a hren cang lai i Trump nih zeitin dah America cu a liannganter khawh ti lai?
Mah ruangah Taluk tu dai tein kan lianngan chin lengmang lai. Kan kaaleng in Syria a kahmi kan duh lo nain kan lungchung cun kan i lawm ziar ko tiah a chim chih. Ref: NYT.