Neil Gorsuch cu US Supreme Court ah 113 naak biaceihtu tuan ding nikhatni ah biakamnak a tuah cang. Tleicia biaceihtu Antona Scalia thutnak hmun ah a thu cang lai. President Trump nih conservative biaceihtu a thimmi Neil Gorsuch nih chan tampi chung US Supreme Court muihma a ser cang lai.
Neil Gorsuch hi kum 49 a si cang. Inn Raang Rose dum ah biaceihtu Anthony M. Kennedy 80, nih biakamnak a tuah pi. President Trump nih a kam in a dirpi. Campaign lioah aa kam bantukin President Trump nih hlawhtling tein Supreme Court biaceihtu a thim.
President Trump nih biakamnak a tuah lai ah a chimmi cu 'biaceihtu Gorsuch, a sunglawi tukmi kan phunghram rungveng ding in atu cun tuanvo khinh na si cang. 'Fimkaan tein um ding, thleidannak ngei lo ding le dingfel tein riantuan ding in kan ram nih kan i zohcho ko.
Upadi tangah na um lai i, a cungah na um lai lo; kan mipi covo na runven lai i, mipi rian tha tein na tuan lai' tiah President Trump nih a chim. Tlamtling tein Supreme Court biaceihtu rian a khanh khawhmi cungah Trump zong aa lawm ngai.
'Ni 100 ka tuan chungah ka hlawhtling' tiah President Trump nih lunglawm ngaiin a chim. Ni kum ah khan Presidet thing Obama nih biaceihtu Merrick B. Garland a rak thim i Republican upa nih an rak duh lo. President thar a rat tikah a thim te lai an rak ti.
President Trump nih tlamtling tein Republican duhmi te a thim khawh cang. A donghnak ah lunglawmhnak a chim. 'A liannganmi kan ram upadi le phunghram hna hi zumh awktlak in ka tuan hna lai i ka ti khawhmi paoh tuah kaa tuan lai' a ti. Ref: NYT.