Philippines pawng nitlak Pacific Rili ah US raltuknak vanlawng phurtu tilawng USS Carl Vinson le Japan raltuknak tilawng Ashigara le Samidare hna cu eksaisai an ngei lai. North Korea nih zarhpini (tu chun) ah 'nan tilawng kan thlakpiak hna lai' tiah a vun hro cang hna.
North Korea State newspaper Rodong Sinmun nih a tialmi cu 'kan ralkap thazaang langhter ding in timh cia kan si cang. Voikhat kahnak bak in nan raltuknak vanlawng phurtu hi rili chungah kan thlak lai' a ti. A tial thanmi cu 'US le Asia ram hrawng vialte a phan khomi a thawng tukmi hydrogen bom kan ngei' a ti.
April 13 ah khan President Trump kan raltuknak vanlawng phurtu USS Carl Vinson hi Korea rili leiah kan thlah lai tiah a rak chim. Mah hnu cun ram hnih karlak ah entainak a linsa chin lengmang. North Korea nih a ruahmi cu kan ram namneh duh le hrocer duh bia a si a ti.
Trump nih a chim thanmi cu kan raltuknak tilawng phu zong North Korea hrocernak le thihpehih runven ding in Korea leiah ka rak thlah lai tiah a chim. North Korea nih missile kan hneksak khawh cang tiah a thanh hnuah Trump nih a chimmi a si.
Trump nih a chimmi cu 'Raltuknak vanlawng phurtu tilawng naak in a let in a thawng deuhmi ti chungah lang lo zong in a kal kho i lang zong in a kal khomi (Submarines) raltuknak tilawng kan ngei' tiah a rak chim. Australia raltuknak tilawng hna he eksaisai an ngeih hnuah atu hi Japan leiah a rat cuahmah lio a si.
April thla a dongh leiah cun Korea rili an rak phan lai tiah US official nih CNN ah an chim. Ni 30 chung hrawng Korea rili ah kan um lai tiah US Navy nih an chim. Zarhpini ah North Korea nih hrocernak an chimmi hi tuan deuh ah rak chim cangmi kha a si. An rak chimmi cu Japan, South Korea, US raltuknak vanlawng phurtu le US ramchung kan kah lai tiah an rak hrocer cang hna. Ref: CNN News.