North Korea nih missile in a kan kah ahcun a thlah tlawmpal minute 10 ahcun million in kan thi ko lai tiah Japan mipi lungre a thei tuk. North Korea nih missile in a kan kah ahcun zeitin dah runvennak kan lak ning a si lai tiah timhtuahnak an ngei chin lengmang cang hna.
US le Soviet Union an rak i hrocer lioah ral tho sual seh law tiah vawlei tangah inn sakmi tbk pawl hna kha an i cawk cia len cang hna. Vawlei an cawh i dawrnak inn thatha an ser hna. Cuticun North Korea nuclear le missile in runvennak an kawl cang hna.
North Korea nih a missile a thlah cang hnuah cun ralrin laknak caan a um ti lai lo. Zeitik dah a thlah lai ti zong an thei lo. An theih tik khi cu hla ngai a kal hnu hna khin a si lai caah mipi ralrin laknak caan a um ti lai lo.
Osaka khuabawi nih a chimmi cu 'zeitik ah dah an thlah lai timi kan thei kho colh lai lo. Cucaah ralrin peknak dar kan tum te lai. Asinain kan tum tikah khi cu a kan phanh lai minung tlawmpal aa duh hrawng lawng ah khin a si cang lai' a ti.
Sianginn a kaimi hna caah cun sianginn kai lio he aa ton ahcun dar kan tum nan theih in nan khung tangah nan i thup ko hna lai tiah ralrinnak an pek hna. Hi hlei cu mah naak tha deuh in ralrin peknak dang a um tak ve lo. South Korea le Japan mipi cu an thinphang ko hna. An mawh hrim lo.
Japan hi Ralpi Pahnihnak ah khan sungh cikcek in an rak sungh pinah Atomic bom nih an ram le an sining a rak thlen dih cikcek hna. Hriamnam kan ser ti lai lo an rak ti. US tu nih runven ding in hnatlaknak an rak tuah, asinain atu cun kanmah tein runvennak kan ngeih a hau cang tiah mipi an au chin lengmang cang. Ref: The Express.