Philippines ram lawng hmanh si loin Asia ram zong thinphang in an um cang. ISIS kut in kan him ti lo an ti. Tu chun ah Khrihfami minung pariat cu an zamnak in an tlaih hna i an zumhnak an hlawtter hna hnuah an lu ah an kah hna.
An tlaihmi hna hi motor in a zammi an si. Vanchiat ah ISIS he aa pehtlaimi Maute tapung nih an tlaih hna. An tuaitam lengmang hna hnuah an zumhnak an hlawtter hna. Cun Muslim catiang Koran an relter than.
Asinain an rel thiam lo caah an lu ah an kah than hna. Lam kam ah an pariat ning tein an hlonh hna. Tapung nih catlap cungah ca an tialmi cu 'an zumhnak an hlawt. Koran an rel kho lo. Nun phu an si lo' an ti.
An thah hna hnuah Philippines ralkap nih an ruak an va lak hna. Philippines cozah ralkap he an i phomh lengmang lio a si. Minung 100 leng an thi cang. Ralkap lei upa pakhat Gen. Restituto nih a chimmi cu 'kan tei chin lengmang cang hna' a ti.
Cun hriamnam le rawl kongah an chambau chin lengmang cang tiah kan ruah. An cawlcangh a zor chin lengmang cang tiah a chim chih. Marawi ah minung 2,000 hrawng an tang rih lai tiah zumh a si. Tampi cu an zam cang hna.
'Rak kan zaangfah ko u. Dinti le rawl zong kan ngei ti lo' tiah hrenmi khuami pakhat nih a chim. Mipi an thahmi zong an tam chin lengmang cang. Ref: The Sun.