Pyongyang newspapers nih a tialmi cu 'nuclear raltho seh law kan nuclear thinhunnak a tuar hmasa cem ding cu Japan a si lai' tiah a chim. An bochan bikmi ramchung news Rodong Sinmun nih a tial thanmi cu 'Korea ah nuclear ral a thawh ahcun kan nuclear meikhu a dawp hmasami cu Japan an si lai.
Harnak pek a kan timmi lawng an tuar lai lo; kan ral a bawmtu paoh nih an tuar lai' a ti.
North Korea official news nih hi bantukin a tialmi hi Japan lehrulnak caah a thinhunnak a langhtermi a si. Nizan ah khan Japanese Defense Minister Tomomi Inada nih an raltuknak helicopter phurtu cu North 'Korea nih a kan kah ahcun nan lehrul colh hna lai' tiah nawl a pek.
Pacific rili cung i US raltuknak tilawng hi nan runven lai tiah Japan defence chief nih an raltuknak helicopter phur tilawng cu nawl a pek hna. Japan Times nih a report mi cu 'North Korea nih US tilawng thlak ding in an hrocer lengmang hna caah runven ding in nawl an pekmi hna a si' a ti.
North Korea newspaper Rodong Sinmun nih Japan cu entainak a linhsattertu nan si. Kan buainak daihter timh loin linhsatter chin lengmang nan timh tiah sual a puh hna. A tlangtar ah an tialmi cu 'Japan's Reckless Act Which Drives Itself Into Ruin" (Rawhnak leiah amah tein aa mongmi Japan tuahsernak) ti a si.
Japan lawng si loin US le South Korea zong a hrocer ko hna. Vutcam le mei rili ah kan ser hna lai tiah raltuknak tilawng eksaisai an tuah cuahmah lioah khan a rak hrocer cang hna. Ref: The Express.