North Korea nih US an hrocer than hna. Kim Jong-un thah ding in timhnak le khuakhannak a ngeimi nan sungthoh kha nan kan pek lo ahcun kan thonginn ah American kan hrenmi hna zaangfahnak ngei loin kan hrem hna lai tiah an hrocer cang hna.
Tuan deuh North Korea hruaitu Kim Jong-un thah ding in American sungthoh (CIA) le South Korean sungthoh (IS) rian an tuan ti i North Korean minung zong an hman hna ti a si. Mah hnu cun North Korea cu an hrang chin lengmang.
An ralkap dirh kum 83 tlinnak ah kan huaitu Kim thah nan timh tiah fak ngaiin an rak hrocer cang hna. Atu ah a thar in US sinah bia an cahmi hna cu Kim thah ding in riantuanmi nan sungthoh hna hi nan kan pek lo ahcun American thongtla kan hrem hna lai an ti cang.
Atu tiang ah North Korea thonginn ah American minung pali an um. 'Zaangfahnak ngei loin hrem le hrem kong cu kanmah nawl a si. Kan upadi ning American thongtla kan ngeihmi hna hi an kong kan ceih hna lai' tiah North Korean vice foreign minister Han Song Ryol nih a chim.
US nih cun 'North Korea hruaitu Kim Jong-un thah ding in timhnak hrimhrim kan ngei lo an ti. Asinain Trump nih cun 'kan hloh a hau te ko lai' tiah a rak chim bal. US State Department biachimtu nih cun 'kan miphun himnak hi kan hmuitinh sangbik pakhat a si ko. An luatnak ding kan i zuam lengmang ko' an ti.
North Korea ah US nih embassy a ngeih lo caah Swedish embassy nih US aiawh in rian a rak tuanpiak lengmang hna. Ref: The Express.