FBI Director James Comey rian a phuahmi nih zungzal a ral simi Russian kut President Trump cu lente a celhter diam cang tiah American sungthoh upa nih cun an chim. 'Teitu taktak cu Russia a si cang' tiah National Security Council ah Director thing a simi Luke Hartig nih cun a ti.
'Mah hleiin Russia nih zeidah an duhmi a um ti lai?' tiah naite ah FBI in aa din kami zong a si i The Soufan Group ah Director a simi Jeffrey Ringel nih a chim ve. Trump nih Comey a phuah ruangah Russia cu an i lawm tuk lai. 'An kan hlathlaimi kan thah khawh cang an ti lai' tiah a chim.
2016 US thimnak kongah Russia le Trump cozah karlak ah zei bantuk pehtlaihnak dah a um timi hi FBI nih an hlat cuahmah lio a si. Mah ruangah Trump nih Comey zong a rian in a phuahnak a si ti hi Democrats le Republican upa cheukhat zong nih an zumh.
President Trump le Russian Foreign Minister Sergei Lavrov zong Comey rian a phuah thaizing ah Inn Raang ah an i tong colh. Comey rianphuahnak zong Lavrov nih capo a seih len. A foreign ministry zung zong nih a caposeihnak biachimmi video in an thlah.
Cun a nih pah in Trump he an kut an i tlaihnak hmanthlak zong a tar chih. Inn Raang lei zong an thinhung ngai. Hmanthlak chuahter lo ding kan timi an tar. An kan hlen a si. Lihchim an si tiah Inn Raang official an zai len.
US ramchung a cawlcangh ning le US a hawile sinah a cawlcangh ning hi tih a nung chin lengmang cang. Zeitluk in dah thennak le theihthiam lonak ka ser lai i, pakhat le pakhat ka hlatter hna lai timi lawng a khang cang. Tutan France thimnak zong ah buainak a ser len an ti. Britain le Germany zong buainak a ser len cang an ti.
Russia nih aa tinhmi cu 'rem lonak ser i then-cheu dih a timh cang hna. U.S. Director of National Intelligence thing James Clapper nih Senate upa hna hmaiah a chimi cu 'Russia nih hihi a tuah lengmang lai. Zeiruangah dah a pehzulh lengmang lai lo? A hlawh pei a tling lengmang cang cu' tiah a chimh hna. Ref: VOA News.