Syria khuapi pakhat Aleppo cu hell vawlei ah a cang. 2011 in Syria ramchung buainak a chuak i, atu tiang an dai hlei lo. A tingting in minung an thi i, vawleicung refugee buainak an chuahter. Atu hmanthlak hi tu chun Syrian cozah raltuknak vanlawng nih a kah hna i inn cim nih a nanhmi a si.
Atu hi hngakchia pa te cu a thi maw a nung dah timi zeihmanh an thei rih lo. Hngakchia pakhat zong inn cim nih a nanh i a ruak in an char. Kan hnu zarh ah khan a si than i, hngakchia nu te zong raltuknak vanlawng nih an kahmi inn cim nih a nanh than i, cawlcang ti loin an char than.
Sizung ah a rannak in an tlik pi i a tha deuh ngai cang an ti. Asinain hngakchia dangdang hna cu an vanchia hna an ruak in an char len hna. Syrian cozah ralkap le Russia nih tapung umnak khua Aleppo cu an kulh cang. Ti le rawl leiin an harsa ngamsam cang hna.
UN nih bawmhnak pek ding an hal hna i dohtu tapung lei nih cun an cohlan cang hna, asinain Russia le Syrian cozah leiin an onh hna le onh hna lo theih a si rih lo.Minung 275,000 hrawng hi Aleppo khua ah an tang rih hna. November 13 ah khan UN nih ti le rawl an va bawmh hna.
UN leiin bawmhnak va pek hna zong hi a har tuk. Turkey le Aleppo in nitlak lei peng in bawmhnak phurtu motor ngan pipi zong timh cia an si cang. Bawmhnak petu leiin an hruaitu nih an chimmi cu Russia le Syrian cozah nih hnatlaknak tling a kan pek lai timi kan zumh a ti.
Nihin ah Russia lei cun a tha cang i, Syria leiin zeihmanh a um rih lo. Russia le Syrian cozah nih an duhmi cu ei awk ngei loin umter hi an duh hna. Cu bantuk cu kan cohlan khawh lomi a si' tiah bawmtu leiin Egeland nih chim. Ref: The Sun.