Nizan ah ISIS nih Turkey ralkap an tlaihmi hna cu tihnung taktak in mei in an khanghnak hna video cu an vun langhter than. Turkish mipi an thinhun tuk sual lai tiah Turkey cozah nih a rannak in an social media network: facebook, twitter, youtube tbk a khar dih colh.
Tihnung video an vun langhtermi ah cun ISIS nih Turkey ralkap pahnih an tlaihmi hna cu an nun buin an kangh hna. A rannak in Turkey cozah nih an ramchung social media network vialte an khar dih colh ve. Mipi an thinhung tuk lai i, fak tuk in sandah an piah sual lai tiah cozah nih an kharmi a si an ti.
ISIS nih Turkey thinhunter ding hrimhrim in an ralkap an khanghpikmi hna a si. Video cun Turkey ralkap pahnih zong an raltha. Zeipoah kan tong ko lai; kan tih lo timi fiang tein an langhter ve. Ding tein an dir i, zeihmanh tihnak an ngeihnak an muihmai ah an langhter lo.
Video nih a chim ning ah cun Wilayyat Halab ah kan thah hna an ti, asinain cheukhat nih cun Aleppo pawng ah a si an ti. An thah lai hna ah ISIS pakhat nih bia a chim i, a chim dih in Turkey ralkap cu hmaiah an rak chuahter hna. Hri in an tem hna i, am hnulei ah mei bantukin hril an chiahpiak hna i, an hri cu mei in an kangh.
Cuticun an pum cung tiang mei a lawn i, an pum tein an kangh dih. 2015 ah an rak tlaih cangmi hna an si tiah cheukhat nih cun an chim. Miungpakhat cu November 29 ah Aleppo peng Al-Bab ah an tlaih i, minung pakhat an tlaihnak cu theih a si lo. Ref: The Sun.