Rome khuapi a simi Italy Khrihfa ram hmanh ah Jesuh min nan hmang lai lo timi a chuak than cang. Kan biaknak hi a kilkam ah thawn chin lengmang a tong cang. Catholic Khrihfami a si lomi upatnak langhternak caah Christmas hla nan sak tikah Jesuh min nan telh lai lo tiah an saya te nih an ti hna.
Sianginn uktu Paola Belini le a sianghngakchia hna cu hmaizarh khin cu stage cungah Christmas hla a sa ding an si cang. Hla an cawnnak caan zong a sau cang. Asinain A hlasak dingmi ah Jesuh min cu a lak ta i biafang dang in an thlen. 'Zeicatiah Jesuh a chuak' ti dingmi ah khan 'zeicatiah party cu nanmah caah a si' tiin an thlen diam.
A nu le pa cu an thinhung tuk i sianginn cu fak taktak in an zai hnawh hna. Jesuh min nih cun pei a kan fonh i, unau sinak a kan pek cu an ti i, fak tuk in an thinhunnak an langhter. Rualremnak le unau sinak thazaang pek loin thencheunak khua nan khang tiah sianginn lei upa cu fak ngaiin an sik hna.
Cheukhat nih cun zapi nih an i hrawm khawh dingmi an sak awk a si, zeicatiah 30% sianghngakchia hi Khrihfa an si lo. Khrihfami hna caah lawng ah sak dingmi zong a si lo. Upatnak langhternak caah a si tiah an sianginn hruaitu nih cun a chim.
Paola nih a chim thanmi cu sianginn hi miphun kip ca le zatlangnun phun kip caah dirhmi a rak si. Cucaah biaknak ah thleidannak a um awk a si lo. Institution dangdang hna nih cun Khrihfami biaknak kha thazaang an pek awk a si ko. Pope Francic zong hi kau pi huap in phung a chimmi a si. Hi bantuk Catholic fundamentalist pawl nih ka khuaruah nan ka harter tuk tiah a zai hnawhtu hna cu a phomh chin ve hna. Ref: The Express.