President Obama nih a namtong bantukin aa hmanmi Secretary of State John Kerry nithumni i Paris biachim cu Republican upa nih hnawmpung chungah an hlonhpiak dih. President thimmi Donald Trump president biakamnak a tuah cun kan thlen than dih lai an ti.
House biachimtu Paul Ryan nih 'Israel - Palestinian daihnak kongah John Kerry biachimmi hi zumh awk pakhat hmanh a tlakmi a um lo' tiah a tweet. Nithumni ah suimilam pakhat hrawng Kerry cu bia a chim i, West Bank le Jerusalem ah Israel nih inn an sakmi a soisel len hna. Obama nih a thlithup in a rak ronh dih cang ruangah an term a dih lai ah Israel fak tuk in an vun buainak hna a si.
Kerry nih Palestinian zong a mawhchiat hna. Tapung riantuannak thazaang nan pek lengmang hna a ti. Cun UN ah US dai tein a umnak ruang fianternak le runvennak a tuah. Israel le Palestinian karlak ah daihnak sernak lam paruk a chuah pi.
Miami Senator Marco Rubio nih Kerry a vun phomh than ve. 'Kerry nih kan ral duhnak pek a timh hna i, kan hawi tha tuk a simi Israel hrawhhral a timh hna' a ti. A chim thanmi cu 'President thimmi Trump he neihniam tein riantuan ding in kaa tim. Israel le US pehtlaihnak hmaan tein kan ser than lai' tiah a ti. "Obama le Kerry nih Jew miphun hi mihrut bantukin lentecelh pi a kan timh' tiah Republican Jewish Coalition Executive Director Matt Brooks nih a chim.
President thimmi Donald Trump le a cozah nih UN biachahnak hi a rannak in an thlen than hrim lai timi kan zumhg lawng si loin US le Israel pehtlaihnak thawng chin lengmang in an ser than lai timi zong kan zumh' tiah a chim chih. Trump zong nih 'Israel hi nihsawh le zeirel loin kan tuahter peng hna lai lo' tiah fak ngaiin tuan deuh ah khan a rak tial ve. Ref: TOI.