South Korea ah na missile system THAAD na chiahmi a rannak in la zokzok tiah Taluk nih US cu a hrocer cang. US nih kan missile THAAD a nung cang. Kan hman khawh cang lai tiah an thanh cangka in Taluk nih an vun auh colh hna.
Norh Korea missile le nuclear runvennak caah kan chiahmi a si tiah US le South Korea nih an chim lengmang ko nain Taluk nih a duh lo. 'Kan dirhmun cu a fek i a fiang: South Korea ah THAAD nan chiahmi kan duh lo. Kan lakpiak than u' tiah Taluk nih an ti hna.
Taluk Foreign Ministry biachimtu Geng Shuang nih nihnihni ah a chim thanmi cu 'tuanvo ngeitu nih a rannak in THAAD missile nan chiahmi hi kan lakpiak than u. Nan lak than lo ahcun a herh ning in kan cawlcang ve lai' a ti.
Geng nih a chim thanmi cu 'President Trump nih North Korea hruaitu Kim Jong-un ton a duhnak a langhtermi cungah kan lungtlin pi. North Korea nuclear kongah cun biaruahnak le theihthiamnak lawng hi lam a ummi a si tiah kan zumhmi a si' tiah a chim.
Nikhatni ah Predsident Trump nih 'North Korea hruaitu Kim he ton ka duh ko' tiah a duhnak a langter. 'Kum no te nih a ram a hruai khawh i a tlaih khawhmi hi upat tlak a si tiah a thangthatnak bia zong a chim chih. Ref: The Express.