Naite ah UN zung ah vote thlaknak a um i, Israel nih Jerusalem le West Bank ah inn sa ti hlah seh tiah vote an thlak. US nih dirkamh ding a simi kha dai tein aa umter i, vote zong a thla lo. Israel a ralchanhmi hna a hnatlak pi hna.
Israel PM Netanyahu thin a hung tuk i, Israel ralchanh in vote a thlami ram he pehtlaihnak chah chung ding in nawl a chuah. Israel Foreign Ministry cu hitihin nawl a pek hna. UN Security Council ah chungtel a simi ram 12 embassy he pehtlaihnak na chah chung lai tiah a chimh hna tiah Israel senior official pahnih nih CNN ah an chim.
Israel nih caan karlak chung pehtlaihnak tuah lo ding in dan a tatmi hna cu Britain, France, Russia, China, Japan, Ukraine, Angola, Egypt, Uruguay, Spain, Senegal le New Zealand hna an si. Hi ram hna he hin riantuan tinak kan ngei rih lai lo tiah PM Netanyahu nih a chim. Hi ram hna foreign minister nih PM Natanyahu an tong kho rih lai lo; an ambassador zong Israel Forign Ministry ah a ra kho rih lai lo.
Cu pinah Israel riantuantu upa zong hi ram hna ah duh ning in an tlawng rih lai lo tiah Israel official lei upa nih an chim. Israel ambassador tu hna cu an umnak ram cozah he rian an tuan ti ko lai. Hi bantukin Prime Minister Natanyahu nih nawl a chuahnak hi ramdang ambassador pahra a ton hna hnuah a si.
UN ah Israel ralchanh in vote an thlakmi kongah a mawhchiat hna. US cungah a thinhung khun. US ambassador zong a office ah a auh i, zarhpini ah Obama cozah he fak taktak in a phomh hna. US ah thlahmi Israel ambassador Dermer zong nih 'UN ah Israel ralchanh in vote an thlakmi nih Israel le Palestinian karlak pehtlaihnak sau tuk harnak a pek lai' tiah a chim. Ref: CNN.