'That is the way it is' timi hla a sa i a minthang taktakmi hlasak thiam French-Canadian nu Celine Dion cu President thimmi Donald Trump nih January 20 i President biakamnak a tuahnak ni ah hlasa ding in a sawmmi cu Celine Dion nih a cohlang duh lo tiah report a um.
TheWrap nih a report ning ahcun Trump 70, le a team nih New York i President biakamnak an tuah laimi timhnak ah Celine Dion 48 cu an sawm kho lo tiah a tial. January 20, ningani ah khan a si lai i, 'My Heart Will Gon On' timi hla a satu hi kan duh nain a si kho lo' tiah chunglei minung pakhat nih a chim.
'Cohlang hmanh seh law a si thiam lai lo, zeicatiah January 20 khi cu Las Vegas ah concert tuah dingmi program an ngei cang' tiah a chim chih. Andrea Bocelli zong nih a sakpiak men te lai tiah zumh a si. Asinain a fan pawl nih an duhpiak lo tuk i aa let than kho te men ti zong biachuak a um.
Us Weekly nih tuan deuh ah a report thanmi cu 'David Foster zong nih Trump sawmnak a al a ti. A sawm lioah cun a rak duh i timhnak a ngei ko nain a hnuah aa let than tiah theih a si. A chimmi cu 'i tel ve ding in an ka sawm, asinain hmaipanh tein ka al hna' tiah a chim. 'Ka tel pi hna lai timi hi kawika in dah a rat timi ka thei lo' tiah Six Page nih an rak tialmi a vun fianter fawn.
Atu tiang ah cun Jackie Evancho lawng a fiang rih lo. National Anthem hlasa ding in timhnak a ngei. President Obama zong a rak sakpiaktu a si i, Trump zong a sakpiak than rih lai. 'Khuaruahhar a si ko lai. Upat awktlak ngaingai a si. Inn Raang caah hlasa kho ding in caan tha ka hmuh cu kaa lawm tuk' tiah a chim. Ref: Us.