Trump le a cozah nih Tel Aviv i America Embassy cu Israel zungzal khualipi Jerusalem ah kan thial lai an timi cu Secretary of States John Kerry nih a vun doh hna. Jordan le Egypt he nan i hawikomhnak zong a dawnh lai i, tihnung a si lai tiah Kerry nih a chim.
Ningani ah CBS News nih Kerry cu biahalnak an ngeih i a chimmi cu 'Jerusalem ah embassy an thial ahcun President thimmi Donald Trump nih Israel le pawngkam ram vialte a puahter dih hna lai. West Bank lawng zong ah a si lai lo; Israel ramchung lila hmanh ah a puak lai i, pawngkam ram vialte tiang in an puak chih dih lai a ti.
Zei tluk in dah dohnak le huatnak a linhsat lai i, a karh lai tiah John Kerry nih a chim. 'Kan hawi Israel le Palestinian karlak buainak hi lam dang in kan phisin ahcun a tihnung taktakmi a chuak lai. Jerusalem ah embassy an thial ahcun state pakhat ah nan i fun kho ti lai lo. Jew miphun naak in Muslim an tam deuh caah Democracy hmanh a um kho ti lai lo. A si kho lomi a si. Nan tuah kho lai lo' tiah Kerry nih fak ngaiin a chim.
Ningaini ah Palestinian hruaitu Abbas nih Trump zong ralrinnak a pek. 'Na chimmi hi tuah hlah. Jerusalem ka thial lai tiah na chimmi hi tuah hlah tiah chimh kan in duh. Palestinian zong kan leng ve te law' tiah a ti. Trump campaign manaher Kellyane Conway nih December 12 ah a rak chimmi cu Jerusalem ah America embassy thial hi Trump hmuntinh ngan bik pakhat a si. Campaign a tuahnak kip ah a chimmi a si' tiah a chim. Ref: TOI.