Zahan zarh zarhpini ah Iran nih a missile hneksanak a tuahmi ruangah President Trump cozah nih dan an tat hna. Dan an tatmi chungah aa telmi hna cu minung 13 le ram kip um Iran company pawl hna an si. Iran nih an vun hro colh ve hna. 'Kan ral nih an kalnak ding lam te an zulh lo ahcun missile nih a tlak hna lai' a ti.
Iran ralkap lu bik a simi Gen. Amir Ali Hajizadeh nih a chimmi cu 'kan ral a simi ram nih an lam an i palh i a hmaam lomi lam an zulh ahcun kan missile nih ruahsurh in a surh hna lai' tiah hrocernak bia a vun chim colh ve. Naite i President Trump cozah nih dan an tatmi hna lehrulnak an vun tuahmi a si. Hrocernak bia lawng si loin an missile zong an vun hneksak than.
Iran nih a ralkap eksaisai zong a tuahter fawn hna. Eksaisai an tuahnak ah an hmanmi hriamnam pawl hna cu Iran scientist nih an sermi lawng te an si tiah uanthlarnak bia a chim chih. Press TV nih a report ning ahcun Iran Senior Vice President Ishaq Jahangiri nih cun US dantatnak hi zeihmanh ah a rel lo a ti. Iran cozah sinah bawmhnak a kan petu thihpheihnak menmen a si a ti.
'Kan ram Iran le nawlngeitu nih zeihmanh ah kan relmi a si lo' tiah a chim chih. Missile kan hneksami hi kanmah runvennak a si. UN phung zong kan buarmi a um lo. Kan ram mipi security caah rian kan tuanmi kongah ramdang nih a kan thihpheih tikah kan zeihmanh a poi lo' tiah Iran Foreign Minister Zarih nh a chim.
A chim thanmi cu 'kanmah nih zeitik hmanh ah ral kan chuah pi lai lo. Asinain kanmah le kanmah kan i bochan ve lai i, kanmah thazaang in kan sermi lawng hi kan i bochan ko lai' tiah Iranian Foreign Minister Javad Zarif nih a ti. Ref: TOI.
"Amrican Kan Lung Aa Rual A Hau" Tiah Wood Nih A Forhfial Hna
---------------------------------