US nih kum tin in Super Bawl lencelhnak zuam tuah tawnmi cu February a zarh khatnak ah an tuah. American mipi nih an sunhsak tukmi Lentecelh Zuamnak puai sunglawi taktak a si i, a hmun ah a kal kho lomi nih cun TV in zoh cio a si. 2016 cu Houston i NRG Stadium an tuah.
An lentecelh caan karlak ah buainak zong a ser ngai i, Muslim ram lengbang nih cun an ramchung ah concert tuahter an sianh lomi Lady Gaga nih hla a sakpiak hna. Lady Gaga nih hlasak thiam sawhsawh lawng si loin a hlasakmi ah hin ruah ding tampi aa tel lengmang. Voi dang i a concert tuah le a thilpuanhruk ning zoh ahcun fihnung le huattlai ngai khi a lo tawn.
Asinain Lady Gaga hi cu tiang lawng a rak si lo. Zapi nih kan ruah khawh naak leng tiang in a hlasaknak in bia a rak chim khomi nu saltha pakhat a rak si ve. Tutan Super Bowl LI halftime ah hla a sakmi ah a lang. NRG Stadium cu minung khat phikphat tein an um hna i, Stadium inn cungah a dir i, 'Pathian America Thluachuahnak Pe Ko' timi hla a vun sak. An uar kho tuk.
'Hi ram cu nan ram a si' (This Land is your land) timi in a vun pek than. Cun inn cung cun a vun zuang i, hri cung in aa thlai pah lioah cun biakamnak an tuah kip ah an chim tawnmi cu 'One Nation Under God' timi a chim. "Aa then kho lomi ram, zalonak ram, mi kip caah tlukruannak ram' tiah a vun chim thluahmah hna. Mipi cu an lungtling tuk hna. Hi biafang a chimmi ah hin America lungthin cu aa fun dih.
A donghnak leiah 'Hitihin Ka Chauh Ning Te A Si" (Born This Way) timi hla a vun sak than. Gay kan siah lesbian kan siah nu le pa sinak in aa thlengmi kan siah kan umnak hmun kip ah kan i palh lo; a nung ding in hrinmi/a chuakmi kan si' tiah a chim. Gaga hi LGBTQ rights a au pi lengmangtu pakhat a si. Vice President Pence zong a kal ve caah tampi khua a ruahter lai tiah an zumh. Ref: CNN.
President Trump Nih Iran Kongah Zeitin Dah A Chim?
-----------------------------------------