London ah British Prime Minister Theresa May le Israel Prime Minister Netanyahu tonnak an ngei. President Trump cozah nih Iran dan an tatmi cungah lunglawmhnak zong a chim. Iran nih nuclear program a ser lengmangmi hi vawlei caah ral a si pinah Iran nih Middle East uk aa tim' tiah a chim chih.
Netanyahu nih a chimm cu 'Iran hi a chak rengh a hau. Naite ah missile a hneksak than i, US nih dan a tat than hna, cucaah US nih lam an kan hmuhsakmi hi tuanvo a ngeimi ram poah nih cun kan zulh cio ding a si. Iran nih hin Middle East hi uk a kan timh cang. Europe zong a hrocer cang' tiah May he an i tonnak ah a chim.
PM Netanyahu nih a peh thanmi cu 'Iran hi Nitlak ram hna ca zong ah tihnung a si i, vawlei ca zong ah tihnung an si. Pakhat hnu pakhat in thinhunnak a ser lengmang' a ti. British Prime Minister Theresa May sinah a chimmi cu 'mah ruangah hin President Trump nih dan a tat thanmi hna hi kan cohhlannak a si. A dang ram hna zong nih Trump cozah hnuzulh in dan an tat cio than hna awk a si' tiah a chim.
A peh thanmi cu 'Iran cawlangh thalo hi zeitin dah kan ngolter khawh lai timi kong hi ceih pi kan duhmi a si' tiah Netayahu nih May cu a ti. Asinain Iran nih cun naite missile hneksaknak kan tuahmi nih UN phung a buar lo, cun kanmah runvennak caah kan tuahmi a si an ti.
Iran missile hneksakmi kongah British Prime Minister Theresa May zong a lungtling lo ngai. Asinain Mr. Netanyahu he ceihmai tinak an ngei te lai. Cun Israel nih West Bank ah inn an sakmi kong le Palestinian state kong a ceih pi lai tiah zumh a si. British Prime Minister Theresa May nih cun Israel inn sakmi hi daihnak hrawktu a si tiah a lungtlin pi hna lo.
West Bank ah Israel nih inn 5,000 sak than ding in timhnak an ngei. Kum 20 chung a tam bik timhnak an ngeih a si. Cun Palestinian zong state kan pek hna ahcun hmailei caah daihnak le thanchonnak sertu a si lai tiah British Prime Minister Theresa May nih cun a zumh. Ref: TOI.
"Pathian America Thluachuahnak Pe Ko:" Lady Gaga
-----------------------------------------