Nilini ah U.S. Defense Secretary Jim Mattis cu South Korea ah a phan. Japan zong a tlawng chih hna lai. United States nih Asia kan hawile kan in um pi ko hna timi langhter awk ah a rak tlawn hna a si. Cheukhat nih cun North Korea vun thihpheih pah awk ah a tlawnmi hna a si an ti.
A tlawn lio hna hi North Korea nih a ballistic missile hneksak than ding in timhnak a ngei tiah report a um he aa tong. Hneksaknak tuah a timhmi hi President Trump hrocernak le zuamcawhnak caah a si a timi zong an um. South Korea a tum hlanah report tu nih an bia an hal i a lehmi hna cu 'THAAD kong ka ceih pi hna lai' a ti.
US nih South Korea ah Terminal High Altitude Area Defense (THAAD) missile ruvennak system tha tukmi chiah a timh. Kap hnih in an i timhmi cu North Korea nuclear le missile program ralchanh hi a si. US upa lei nih an chimmi cu North Korea hi nuclear hriamnam ser hram thok than aa tim an ti. Mah ruangah THAAD hi US hawile runvennak caah chiah an timhmi a si.
Khatlei in Taluk nih an hnatlak pi lo tuk hna. South Korea ah THAAD an chiah ahcun Asia ram hrawnghrang ah nawlngeihnak tlukruannak a um lai lo an ti. Taluk nih an chim thanmi cu US nih chingchoh (tlaihhip) a kan duh caah a si an ti fawn. South Korea dohtu party lei zong nih THAAD chiah hi an duh lo.
Mattis le South Korean Prime Minister Hwang Kyo-ahn zong biaruahnak an ngei lai. President Park Geun-hye kha eihmurnak sual an puh i, a rian a chiah caah Hwang Kyo-ahn hi caan karlak President a tuan chung. Japan zong a tlawng rih hna lai. Mattis nih S. Korea le Japan a tlawnmi hna hi an i pehtlaihnak caah a biapi ngai. US ralkap 80,000 hrawng Japan le Korea ah an um. Ref: VOA News.
Iran Missile Hneksaknak Nih Trump Cozah Thin A Hunter Ngai
-----------------------------------------------