'Nihin ah President Trump aiawh in bia tiamh kan duhmi hna cu US nih NATO kan dirpi peng ko. NATO cungah kan dirhmun a fek zungzal ko lai. President Trump cungah nan zumhnak nan chiah bantukin kanmah zong nih nan cungah kan chiah ve ko' tiah Pence nih a chim.
A chim thanmi cu 'US le Europe kan chiatnak le kan thatnak cu then awk tha loin aa tlaimi a si. Nan temtuarnak cu kan temtuarnak a si. Nan hlawhtlinnak cu kan hlawhtlinnak a si. Hmun khat ah hmailei ah kan kal ti hna lai' tiah German, Munich Security Conference ah a chim.
Nirukni ah Munich ah Europe hruaitu upa tonnak an ngei hna. NATO le US riantuan tinak ding caah a biapi tukmi tonnak a si. President Trump nih NATO hi a thihpheih lengmang hna tikah an hawi Europe ram lungthin a nuam bal lo. Asinain Munich ah Trump aiawh in Vice President Pence nih bia a tiamh cang hna.
Asinain Pence nih a biapi ngaimi a chimhmi hna cu 'NATO ram runvennak caah tangka nan pekmi a tlawm deuh caah nan retheih deuh cio a hau lai tiah fiang ko in a chimh hna. President Trump zong nih a chim lengmang cangmi a si.
Russia kong zong a chim chih. US nih Russia he zeimaw tiin pehtlaihnak lam kan tuah zong ah Russia nih a tuahsernak cu a tuar thiamthiam ko lai. Hi kong hi fiang tein chimh kan duh hna tiah a chimh chih hna. Ramdang foreign policy kongah Pence nih a voikhatnak a biapi ngaimi a chim a si.
NATO hruaitu le Europe ram hna caah cun hnangam ngai a si cang lai. Munich Security Conference tonnak hi US le NATO ram hna pehtlaihnak caah a biapi ngaimi a si. Trump cozah kainak in a voikhatnak tonnak an ngeih a si. Ref: CNN.
Ronaldo Le Angelina Jolie Nih Syrian Refugee Kong An I Zeih Lai
--------------------------------------