'Na missile na hneksak than ahcun kan duh ti lai' lo tiah ralrinnak an pek hna hnuah Taluk le Russia ralkap cawlcangh a tha tuk cang. North Korea nih a lungput thumh a tim lo timi fiang tein Taluk le Russia zong nih an hmuh tikah an thinphan cang.
US le a hawile cu Korea le Japan rili ah eksaisai an ngeih cuahmah lio a si. North Korea nih kan kap sual seh law zeitin dah kan i runven lai i, kan lehrul colh lai timi cawnnak an ngei. North Korea nih cun raltuknak a chuah zong ah kan phomh hna lai; US hrimhrim cu ciam dih in kan kah lai an ti.
Nizan kha North Korea ralkap dirh kum 83 tlinnak an tuah i an hrimnam thazaang langhternak zong a ngei. An i hrocer lioah North Korea nih a hriamnam thazaang a langhtermi hi US le a hawile hrocernak phun khat a si tiah expert nih cun an hmuh.
Taluk nih North Korea cu cawlcangh in a siah bia a siah hrocernak le thinhunternak bia chim ti hlah tiah Taluk nih ralrinnak a pek cang. Missile zong hneksak ti lo ding in ralrinnak a pek i a ralkap zong timh cia in ramri ah a chiah dih cang hna. Russia zong timh cia in an um cang.
Taluk media ngan bik Global Times nih a tialmi cu 'kir than awk tha lomi dirhmun ah an phan chin lengmang cang. Raltuknak tlangpar ah Washingtong le Pyongyang an um cang' tiah a tial. 'Nuclear hneksaknak na tuah than ahcun na tuar tuk lai' tiah Global Times zong nih ralrinnak a pek cang.
North Korea kongah US le Taluk hi aa su lengmangmi an si nain President Trump a vun kai hnuah Taluk nih North Korea a dir pi ning hi a nem chin lengmang. North Korea zong a rengh chin lengmang timi a lang. North Korea petrol man kaimi zong hi Taluk renghnak a si ko lai tiah an zumh. Ref: The Express.