US ralkap inn pi Pentagon nih Iran le North Korea cawlcangh an hlat than cuahmah lio a si. 'Sualnak a chuahnak ram' tiah an auhmi ram pahnih hi thlithup in pehtlaihnak an ngei ko timi an theih. US doh ding in rian an tuan cuahmah lio an si an ti.
Tu zarh chungah khan Iran nih a raltuknak tilawng in missile a hneksak an ti. Iran raltuknak tilawng (submarine) zong atu hi North Korea tilawng hmun ah an hmuh. US ralkap upa pawl nih zei ko dah an tuah hnga tiah an hlat cuahmah lio hna a si.
Iran le North Korea hi US a hua taktakmi an si. President thing George W. Bush nih cun 'sualnak a chuahnak ram an si' a rak ti. Nihin tiang in Bush biachim zong ro a ling phah.
President thing Obama chan ah Iran he hnatlaknak an tuah i, Iran tu cu nuclear program ngol law dan kan in tatmi kan onpiak lai an rak ti. Asinain an zum lo. A thli in nuclear a ser peng ko lai tiah an zumh. Iran cu tangka ngei a si caah atu zong Hezbollah raltho hi hriamnam in a bawmh lengmang hna.
Syria ah Israel raltuknak vanlawng nih an kah lengmangmi hna khi Iran le Syria dirkamhmi tapung an si. Atu cu nuclear program ser ngol law dantatnak kan in onpiak lai an ti caah cun North Korea nuclear sernak ca tu ah a tangka a hman cang lai tiah an zumh.
1997 hrawngah Iran le North Korea bawmhnak in Syria ah nuclear an rak ser i, Israel nih an theih i an rak phomhpiak dih hna. Israel le US hrawhnak khua a khang lengmangmi an si caah atu zong North Korea rili i Iran raltuknak tilawng an hmuhmi hi a sawhsawh a si lai tiah US ralkap nih an chim. Ref: The Express.