North Korea nuclear hmun Punggye-ri ah minung an cawlcanghnak satellite hmanthlak thar a chuak. April 29 hrawngah an rak thlakmi a si i, naite ah a chuak. North Korea nuclear hmun maw a si; volleyball lentecelhnak dah a si timi a fiang tuk lo.
Asinain cheukhat nih cun ralkap cawlcanghnak a si an ti. Tuan deuh ah satellite hmanthlak an lakmi ahcun tiluannak an rak hmu lo; April 29 ah an lakmi ahcun tiluannak zong an hmuh cang ti a si. North Korea hruaitu Kim Jong-un nih a nuclear a hnawh chin lengmang cang an ti.
Ralkap an i cer lennak hmanthlak le rian an tuannak hmunthlak zong an lak. North Korea kongah expert a simi New York khua in Joe Bermudez nih a chimmi cu 'volleyball lentecelhnak hmun ko a lomi North Korea minung cawlcangh ning hi phundang ngai a si' a ti.
'Hmun kip ah an cawlcangh ciomi le hi tluk in a tammi minung cawlcangh hi a sawhsawh a si lo. North Korea nuclear hi kan ruahnak leng in tuan ah an lim khawh men lai. Hneksaknak zong tuan ah a tuah te lai' tiah a chim chih. Atu zong ka hneksak than lai a ti nain zeihmanh a um rih lo.
Zeitik ah dah North Korea nih a nuclear a hneksak lai i, lehrulnak a um te lai ti lawng cuanh cio a si. President Trump nih cun 'North Korea nih a hneksak ahcun ka lungtling ti lai lo. Taluk President Xi zong a lungtling ti lai lo' tiah a chim. Ref: The Express.